accion personal Occidental

Empleadonan di Occidental Hotel su departamento di benta y mercadeo a walk out diamars pa mustra nan mal contento. “Nos ta fada cu tur hende ta bin riba e pida baranca aki, traha placa riba lomba di nos hendenan, y ora cu tin un disputa laboral y ora tin cu sali pa e derecho di e trahado e companianan aki no kier respeta esey,” Esaki segun Rudy Richardson un di e empleadonan afecta.

Mirando e situacion cu e empleadonan ta haya cu ta uno inhusto, special poniendo enfasis cu no ta prome biaha tin abuso ta tuma luga cu companianan cu ta bin di afo, e empleadonan a dicidi di bay prensa cu e noticia aki por medio di un walk out. E walk out a bay den un manera pasivo, organisa y profesional, sin involucra ningun turista. Empleadonan a enfatisa cu e problema ta algo interno entre e oficina di benta y mercadeo cu ta un team. “Esaki ta e situacion actualmente y nos kier pone bon cla cu nos no ta bay acepta e situacion.”

Situacion
Richardson: “Nos ta di Sales & Marketing di Occidental Vacation Club y nos tin un mal contento masha grandi mes. E guera a cuminsa ora cu e compania Barcelo a cumpra e hotel. Na cuminsamento di october, nan a cuminsa traha riba e departamento di mercadeo, nan a hala nan di e lobby. E departamento di mercadeo ta esunnan cu ta solicita pa turista drenta. Despues di a haci esaki e “tour flow” a baha, pues no tabata haya mes tanto tour manera normal. Djey nan a cuminsa cu e guera contra di e oficina di e bendedo nan. Locual cu a pasa ta cu nan a saca nos for di nos oficina di benta, hinca nos den un haula chikito pa casi tres siman. For di e tres simannan ey, dos siman nos tabata sin airco. locual cu ta pasa e ora ta cu nos produccion a baha, e mercadeo a cuminsa bira frustra y e bendedo nan tambe nan benta a baha.”

Departamento di labor
Segun Sr. Richardson a sigui splica, a yama Departamento di Labor pa splica tocante di e situacion. Labor a presenta na e hotel casi 1 siman y mey pasa, nan a sinta cu cada empleado afecta den e situacion aki individualmente, tuma rapport y haci anotacion, nan a wak e situacion cu e trahadonan tabata aden, y a bay di acuerdo cu e empleadonan cu esaki ta un abuso laboral, sinembargo no a tende nada mas for di nan.

“Nos ta bay mas leu, e intimidacion y manipulacion di gerente a cuminsa, nan kiermen cu si nos kier stop di traha pa entrega nan un pakete. Nos a bisa nan cu nos no ta traha asina, y cu na Aruba tin ley y cu nan mester paga cada empleado basa riba e leynan laboral. Locual cu a pasa e ora ta, cu nos a tuma conseho di nos abogado kende a manda e compania pakete laboral pa yega na un solucion. Ayera mainta e abogado di e compania a yama nos abogado bek anto a haci “chercha” di nos oferta y a bisa nos abogado cu nan no ta bay acepta e pakete cu nos abogado a propone, anto dado caso, nan lo bin cu un pakete cual nan lo dicidi riba dje.

Sr. Richardson a sigui splica cu luna di october a habri e empleadonan cu menasa laboral, palabranan manera: “Si bo kier pakete, bo por tuma esey numa, pero bo ta bay acepta locual cu nos ta duna bo”. “Wel nos kier manda un mensahe na e gerente di e hotel cu na Aruba tin ley. Y si bo no ta respeta e leynan, abo hunto cu bo compania tin cu baha na awa.”

Manipulacion y gañamento
Aki ta papiando di mas o menos 25 trahado cu ta bay cay den problema financiero pa motibo cu e compania no ta respeta leynan labora. Occidental sa como cu nan ta deal cu Barcelo pa 2 aña, con nan manera di traha ta. Ta wordo bisa cu Barcelo ta bay inverti 25 miyon den Occidental, y cu ta bay tin diferente cambio, incluyendo un edificio nobo y cu e departamento di benta ta bay keda cu nan trabou, un empleado a splica sinembargo no ta mira esaki ta mira e contrario. “Manipulacion y gañamento so tin cada biaha cu nan bin Aruba. Nos ta cana yega di un dia pa otro haya sa cu un tin trabou y cu un tin inventario. 15 di october 8or y mey di mainta tabatin un reunion y mi a puntra e hefenan tocante esaki, nan a bisa cu e trabou lo keda pero ta miho nos tuma pakete pasobra no tin inventario. Esaki kiermen cu nos ta bay muri di hamber, pues nan kier intimida nos pa tuma e pakete cu nan ofrece of laga esaki y muri poco, poco.” Nos tin tres siman cu nos no ta ganando placa pa motibo cu no tin tour. Nan a corta den tur esaki y nan a kita OPC cu ta trece e hendenan paden. No tin ningun acuerdo haci riba e situacion, nan ta haci locual nan kier ki ora cu ta. Pues mester caba cu e sistema laboral cu ta haci abuso cu trahadonan aki na Aruba, el a splica.

Aworaki e empleadonan a enfatisa cu nan a cana henter e proceso di acuerdo cu e leynan laboral, te cu ta na e momento di walk out, pero nada ta wordo haci. Companianan no por sigui bin Aruba anto causa hamber. Companianan no por bin cu nan actitud y leynan di afo y manipula pueblo. Ta bay bin mas hamber na Aruba y e situacion no ta contribui na e bienestar di Aruba. E companianan ta purba aplica locual nan at aplica na paisnan cu economia na werki y abuso e trahadonan aki na Aruba y segun e empleadonan ta splica, nan ta cuestiona ora cu nan bay departamento di labor. “Nan ta keda haci esey mas dificil pa nos mes fada y kita.”

Consecuencia
Entrada di e empleadonan ta basa riba comision pues si corta den tur  medio pa haci promocion y haya turista, e empleadonan no ta gana suficiente. Segun e empleadonan danki na un ley di un salario minimo implementa pa minister Otmar Oduber, tin esey. pero E comision ta e entrada, nan a splica.

Consecuencianan cu lo bin si sigui laga companianan di afo haci asina constantemente ta cu lo tin famianan cu hamber, famianan cu no por cubri nan debe, criminalidad, cas ta bay wordo kita for di famianan y debenan lo keda crece, cual ta reaccionnan y preocupacionnan cu e empeladonan a duna.

Finalisando a puntra e empleadonan si nan tin un sindicato y nan a splica cu tabatin uno den pasado pero no a logra nada cun’e y pa motibo cu e grupo di trahado ta 25 solamente, no ta haya representacion di e sindicato. Occidental semper tabatin problema cu trahadonan, aworaki nos mes ta para ta bringa pa nos departamento.

LEAVE A REPLY

Please enter your comment!
Please enter your name here