Awe e acuerdo di e lantamento di e Unidad Mensenhandel y Mensenmokkel a wordo firma pa minister di Husticia, Seguridad y Integracion, procurador-deneral di Aruba, alto comisario di polis y comandante di Koninklijke Marechaussee.
E creacion di e team special aki di recherche ta forma parti di e plan di accion integral di Aruba pa combati contrabanda y traficacion di hende pa e periodo di 2018 te 2022. Asina OM ta informa den un relato.
E Unidad di Mensenhandel y Mensensmokkel (UMM) ta bao guia di un fiscal di husticia y a wordo lanta na 2017 como unidad di investigacion operacional. Tanto Ministerio Publico, como Cuerpo Policial di Aruba y Marechaussee ta forma parti di dje.
UMM ta enfoca penalmente riba contrabanda y traficacion di hende y tin (entre otro) como meta pa:
- investiga y persigui sospechosonan
- elimina organisacionnan criminal y bay tras di corientenan ilegal di placa
- acumula y comparti informacion tocante contrabanda y traficacion di hende
- kita capital criminal procedente di contrabanda y traficacion di hende. Pa cu esaki UMM ta traha hunto cu Afpakteam.
“UMM a logra varios exito caba desde cu el a wordo lanta aña pasa. Desde e tempo ey 7 caso di mensensmokkel a bay corte. Na e momento aki tin 3 investigacion di mensenhandel andando”, segun OM.
Operacion Libertad
Na inicio di april 2018 UMM a forma parti di un accion hopi grandi multidisciplinario di contrabanda di hende yama Operacion Libertad bao guia di e coordinador nacional di mensenhandel. Varios departamento a forma parti di e accion aki, entre nan Ministerio Publico, Cuerpo Policial di Aruba, Kustwacht di Aruba, DIMAS, Marechaussee, DAO, DVG, FIOT, Marina Real y Oficina di Victima. E accionnan penal/administrativo a dura 4 dia largo y a tuma luga tanto riba lama como riba tera.
Riba lama tabatin controlnan conoci como 100% controle na luganan na costa di cual ta conoci cu ta trafica cu hende ey, y na companianan di watersport, segun e relato di OM.
Riba tera tabatin controlnan entre otro, na un restaurant, un sitio di construccion, hotelnan y algun joyeria y un posibel bordeel ilegal.
Unico den region
“E accion multidisciplinario aki ta pas den e Plan van Aanpak Integral cu a wordo firma awe pa bringa mensenhandel y mensensmokkel y ta unico den nos region”, OM di Aruba ta bisa.
Bao guia di un experto riba tereno di mensenhandel/mensensmokkel cu ta traha pa Ministerio Publico di Aruba, a bin plannan di accion integral pa Curaçao, Sint Maarten y islanan BES, mirando cu e experto di Aruba ta coopera cu e paisnan aki tambe.
“Den e plannan aki cu a traha pa e otro paisnan, ta describi (entre otro) con necesario ta pa e varios instancianan di gobierno coopera cu otro. Na Aruba e cooperacion aki ta funciona pa basta tempo caba den forma di e Taskforce Mensenhandel/Mensenhandel.
Durante e accion Operacion Libertad a keda comproba un biaha mas cu e cooperacion aki na Aruba ta bayendo hopi bon mes y ta masha valioso”, segun OM cu ta splica cu bringa contrabanda y traficacion di hende ta un prioridad halto pa Aruba.
