Zika, Dengue y Chikungunya ta bou nivel ‘endemico’

Despues di un silencio largo riba e situacion di Zika riba nos isla, dokter Wilmer Salazar di departamento di Salud Publico (DVG) a bin cu informacion breve riba e topico aki. El a bisa cu afortunadamente y a pesar di e yobidanan, e casonan raporta di Zika pero tambe di Dengue y Chikunguya ta ‘bou un minimo di expresion’. E kiermen cu e casonan actual ta abou di e nivel of caracter ‘endemico’.

El a bisa cu ainda nos isla tin e privilegio di bisa cu nos no tin niun alarma contra e tipo di malesanan aki. Nan tin un grupo di control cu ta trahando pa preveni e virusnan aki y nan ta recorda na tur comunidad pa mantene nan cura liber di criadero di sangura.

Keintura geel
Ya caba algun agencia di biahe a cuminsa pone nan clientenan na haltura cu entrante 1 di maart, autoridad di salud publico lo cuminsa exigi e carchi geel of di salud pa controla si e persona ta vacuna contra keintura geel. Nan ta recorda cu e vacuna aki mester wordo aplica no mas laat cu 10 dia prome cu e persona ta biaha.

Sr. Salazar a informa cu actualmente no tin caso di keintura geel na Aruba. E problema den nos region ta wordo registra den cierto area di Brasil, pero e no a bira den un epidemia ainda. Mirando cu nos tin presencia di e sangura Aedes aegypti cu ta transmiti no solamente keintura geel, sino Dengue y Zika, DVG kier evita cualkier entrada di un persona infecta cu e virus di keintura geel cu por bira un problema pa nos pais.

P’esey nan a pidi e hendenan cu ta biaha pa e region di Sur-America, no solamente Brasil sino na cierto region di Venezuela y otro paisnan bisiña unda nan por resulta infecta, pa nan haya e vacuna prome cu nan ta biaha. E ta un regla hunto cu Organisacion Pan-Americano di Salud (PAHO) pa Aruba implementa un sistema pa sigura e proteccion di nos comunidad contra e virus aki.

Nan ta exigi esaki pa tur e paisnan cu ta aparece riba e lista di Organisacion Mundial di Salud. Nan ta paisnan den riesgo di keintura geel, caminda nan lo wordo exigi e vacuna of carchi geel contra keintura geel. Esaki ta e documento di garantisa cu por mustra cu e persona of biahero ta proteha specialmente si nan ta bin di e paisnan unda a wordo raporta casonan di e malesa aki.