8Jun,JO, Taxista1.JPG

Tanto Minister Otmar Oduber como e taxi centralnan a tene un conferencia di prensa pa asina trece nan punto di bista, cual ta hopi diferente, riba e regulacion di permisonan pa taxi. Di un banda, nos ta haya cu minister Otmar Oduber ta bisa cu e ta para banda di e taxistanan y di otro banda, nos ta haya un oposicion feroz, caminda cu e taxistanan ta contra di e ponencianan di e minister, argumentando cu e regulacion cu e ta biniendo cun’e ta uno inhusto y cu sigur lo afecta nan como persona, nan famia y financia.

A haci hopi pa taxistanan

Ora cu e gobierno aki a sinta, a firma un protocol cu e taxistanan, segun Otmar Oduber. A bringa te na ultimo loke ta trata un nombramento di un gran cantidad di taxi den tapara di campaña na 2009, ora ya caba cu e gobierno tabata bayendo cas, cu nan a nombra un cantidad di hende y a para esey.

E mandatario a splica cu a firma un protocol caminda cu a reconoce dianan di vacacion pa taxistanan cu nunca antes tabata existi, pasobra nan ta emplea riba nan mes, nan no ta doño di nan permiso y nan no tabata tin derecho riba vakantie. E minister a reconoce e derecho aki. Asina ey a mira cambionan cu a tuma luga, por ehempel cambionan fiscal, cu a haci posibel cu e taxistanan, cu en bes di 4 aña pa cambia nan auto y haya un impuesto preferencial  y a cambia esey pa 3 aña. Si tin un minister cu a para banda di e taxistanan ta su persona. E lo keda haci’e pasobra nan ta e miho embahadornan cu nos tin pa nos turistanan aki na Aruba y mester por duna nan e instrumentonan pa nan por traha manera mester ta. Ora cu mira Dangui Oduber y Speed Andrade, cada biaha ta purba di trece cosnan padilanti, pa loke ta e MB cu a wordo publica como si fuera cu e minister lo ta bisa cu nan ta hendenan cu no ta traha cu calidad of nan falta di calidad of cu nan no ta di confia, ningun caminda den e MB ta poni algo den e direccion ey.

Proteccion

Al contrario, den e caso aki, e MB atrobe ta pa proteha e propio taxistanan, pa sigura calidad den transporte publico, pa sigura cu nos ta keda sigui brinda e siguridad necesario den transporte publico y diaranson awo minister a invita tur bond di taxi a splica nan un biaha mas riba e MB cu a wordo publica aki.

Taxistanan preocupa

Di otro banda nos ta haya e taxistanan, cu ta miembro di e cinco diferente taxi central nan, esta TAS, Diamond, Professional, ATC y A1, ta sumamente preocupa cu e regulacion nobo cu e minister ta bin cun’e. John Croes, kende tabata presidente di TAS y miembro actual, ta conta cu den pasado tambe, specialmente durante campaña, minister di transporte semper a yama nan pa tuma un decision riba cualkier cos cu mester wordo haci, semper a yama e taxistanan pa sinta na mesa cun’e pa discuti riba e decision cu e ta bay tuma. Pero e biaha aki a mira cu el a tuma decision sin yama e taxistanan, sin bisa nan nada. Pa tal motibo a dicidi di yama un conferencia di prensa pa mustra nan desacuerdo na prome luga y Croes, como ex presidente di TAS y tambe como un di esnan cu tambe ta den 65 aña di edad, ta haya cu atrobe decision ta wordo tuma sin pia sin cabes. Mescos cu diferente otro decisionnan cu no lo bay aden pasobra e ta bira algo politico, pero tambe ta decisionnan cu ta wordo tuma sin tene contacto cu e hendenan concerni. Por ehempel Croes, cu 25 aña den taxi y 20 aña cu TAS, tin hopi experiencia y a pasa den hopi cos. Den pasado a yega di welga y hasta demostra contra su mesun gobierno. E tempo ey Croes tabata cu minister Briezen. A pone un welga contra dje cu tabata su propio gobierno. A blokia aeropuerto e dia ey. Algun di nan a haya boet, pero despues a wordo cancela. Pero a rabia asina tanto pa e motibo tambe a tuma un decision sin tuma contacto cu nan. Ora cu ta yama purba di haya su persona, no por a haya contacto cu e minister, of e tabata sconde, etc. A mustra su persona cu te aki e taxistanan a yega y ora a mira cu cos ta serio cu aeropuerto a wordo blokia cu turistanan ta baha maleta banda di e rotonde, cana bay paden, e ora a mira cu cos ta serio. E ora a dicidi di yama un reunion pidi pa para e welga. A sinta na mesa y yega na un acuerdo. Pero awor atrobe, tin cu bisa, cu si tin cu bay all the way, ta haci’e. Loke a sali den corant awe y den e dianan cu a pasa y tambe via Whatsapp, no ta aceptabel, ni pa TAS ni pa ningun di e otro central nan. Presidente di TAS a pidi Croes pa habri e conferencia, pa motibo cu e ta un di e mas bieunan, como chauffeur di taxi y a dicidi di haci’e y cu si nan mester bay mas leu, nan lo bay mas leu, Croes a splica.

Traspaso

Un di e preocupacionnan cu tin awor aki ta articulo 2 cu e minister kier kita e traspaso di e taxi chauffeurnan na su famia of persona di confiansa. En bes cu e gobierno of cualkier gobierno yuda un ciudadano progresa y sinti su mes satisfecho di e gobierno, ta pone Blanca Orman, kende ta un taxista, kende a “hereda” su permiso for di un mayor di dje,  sinti hopi defrauda y desapunta y ta disgusta. No sa cuanto palabra Orman por a expresa esey, el a bisa. Cu ta kita e derecho pasobra el a haya e permiso for di su mayornan, el a pase y su intencion ta cu si e no por sigui of si e ta incapacita pa cualkier cos cu a pasa, accidente of malesa, e por tabata tin e opcion di pas’e pa su yiu of un famia, cu lo por percura di loke ta sosode den famia. Awor aki ta kita e derecho di traspaso. No ta perhudicando e taxista so, ta perhudicando e taxista su famia, ta perhudicando su posicion economico, ta perhudicando su futuro, tur locual cu tin di haber ora cu ta kita su derecho pa pasa e permiso of pa wordo manteni despues di un malesa cronico of dificil cu e no por stuur mas. Esey ta un cos cu te ainda Orman no por pensa dicon el a tuma e decision ey, pakico el a tuma e decision ey. No por pensa ningun motibo logico cu e minister por a pensa riba esey. Tabata algo cu semper a sosode y den su gobernacion tambe a sosode, pasobra el a haci traspaso pa varios otro taxista y no tabata tin ningun indicacion grave cu el a tuma e decision di cambia esaki.

Si e no tabata di acuerdo di dje, for di ora cu el a drenta gobernacion, e por a alerta cu esaki ta su maneho, esey e kier pa wordo haci. Pero e no a haci’e. El a bay di acuerdo cun’e, el a haci traspaso nan y awo diripiente, sin ningun aviso, sin yama e taxistanan. Nan ta envolvi, por a duna nan e importancia di avisa nan kico ta bay pasa pa sa kico e taxistanan ta bay argumenta cun’e.

Chauffeur assistent

Otro cos mas cu e Minister a menciona den su disertacion na prensa, ta e asunto di “hulpchauffeur”. Akinan tambe Orman a menciona cu pa pone hulpchauffeur cu ta wordo regula pa DTP, pero con tin un siguransa cu e hulpchauffeur ey ta bay percura pa e taxi haya su placa. E hulpchauffeur por traha y despues cu e caba, e ta bay. Ken ta bay para responsabel. P’esey e taxistanan tin su personanan di confiansa cu sa di experiencia. Un hulpchauffeur no ta bira uno di un dia pa otro. E ta traha pa otro taxistanan. Ta haya tende cu e ta cumpli bon, e ta trece placa na ora y p’esey ta sigui cu e persona ey. Cu ta bin cu regulacion, pero e regulacion ey mester ta hopi mas estricto pasobra ta perhudicando e persona, Orman a menciona. 

LEAVE A REPLY

Please enter your comment!
Please enter your name here