Stanley dabian celebracion patrio.JPG

E aña aki cantidad di actividad  ta tuma luga den cuadro di celebracion di 40 aña di Himno y Bandera y 30 aña di Status Aparte di Aruba. 

Departamento di Cultura conhuntamente cu Comision Celebracion  Dia Nacional y demas instancia cu a uni pa duna contenido na e fecha importante di  18 Maart ta publica un calendario  di actividad cu ta tuma luga ya sea den Centro di Bario, museonan, instancia gubernamental, etc… 

Manifestacion cultural 

Awe entre otro actividad programa lo tin e ceremonia protocolar y  ofrenda floral na plaza Monumento 18 di Maart cuminsando fei 5’or atardi pa 6’or anochi. Despues  lo tin manifestacion cultural, un anochi grandi riba plaza Libertador Betico Croes cu ya fei 7’or atardi lo tin actividad. Lo tin tent cu un variedad di cuminda dushi y lo tin pre actuacion di algun grupo tipico lo toca cu caha orgel, etc…  Pero e  parti oficial ta cuminsa pa 9’or anochi te cu  banda di 12’or anochi. 

E parti oficial ta un actividad grandi cu lo dura casi dos ora di presentacion, y e ta bou encargo di Alirio Wever. E presentacion aki lo ta cu canto, baile, poesia, recordatorio, etc… E anochi aki lo cera cu di un forma festivo cu MBO y Robert y su Solo Banda Show. 

18 di Maart

Riba 18 di Maart lo tin e custumbrando ofrenda floral  na nos estadistanan Arubiano cu historicamente a guia  e lucha pa nos Status Aparte. Pa 8’or mainta lo tin ofrenda floral na Plaza Henny Eman. Pa 8:15 am lo tin na Plaza Libertador Betico Croes y 8:25 am na Plaza Juancho Irausquin. 

Despues di esey lo tin e gran ceremonia protocolar dilanti Bestuurskantoor cu e marca cu tur e grupo uniforma. Pa 9’or di mainta caba e mandatarionan ta cuminsa yega y pa 10’or di mainta te cu 12’or di merdia, e ceremonia aki lo tuma luga. Den e ceremonia aki Prome Minister, sr. Mike Eman lo duna su discurso den cuadro di e conmemoracion aki.

E ta un evento masivo cu lo hala hopi atencion ya cu lo tin presentacion cultural y grupo di baile di Carnaval. E automobilistanan mester tene cuenta cu e  cayanan den e area ey lo bay ta cera.  

Sr. Stanley Dabian ta invita henter pueblo di Aruba pa bin celebra en grandi e acontecimento nacional tan special aki.  E ta un celebracion nacional di nos pueblo.  

 

  

 

LEAVE A REPLY

Please enter your comment!
Please enter your name here