Home Regional OM Corsou: man duro contra explotacion sexual di menor

OM Corsou: man duro contra explotacion sexual di menor

412

Ministerio Publico (OM) di Corsou tin sospecho cu tin abuso sexual di mucha muhe menor di edad riba escala comercial andando na Corsou. Pa motibo di esey lo haci mas esfuerso pa combati esaki.

Traficacion di hende ta algo cu pa varios aña tin nan atencion, OM ta declara den un relato. E ta un di nan prioridadnan. E departamento ta bisa cu nan ta haya mas indicacion, mayoria biaha ta trata señalnan for di instancianan cu ta duna ayudo na e victimanan, cu tercernan ta gana placa cu e explotacion di e muchanan. Nan mes a ripara esaki tambe den casonan penal diariamente unda nan ta persigui esunnan cu ta abusando e muchanan. Y ta mira cu e abuso ta bay man den man cu ganashi pa tercer partidonan.

Pa motibo di esey OM tin e sospecho cu tin explotacion di mucha muhe di menor edad na Corsou. Nan ta bende e muchanan den prostitucion. E consecuencianan pa e muchanan riba termino cortico ta: malesanan di transmision sexual, embraso hubenil, abortus y dropout di scol. Riba termino largo e muchanan ta enfrenta trauma psicologico, adiccion, violencia cu ta ripiti su mes como e victimanan ta cuminsa abusa victimanan nobo.

“Prevencion ta necesario pa asina preveni hopi otro problemanan den nos comunidad. Sinembargo nos no por combati explotacion sexual solamente cu ley penal. E ta un problema complica cu mester resolve integralmente”, segun OM.

Pa motibo di esey OM ta bisa cu nan lo colabora cu otro instancianan y departamentonan concerni pa yega na un maneho integral contra explotacion sexual di menor. Nan ta cuminsa cu un proyecto unda lo colecta informacion pa asina haya un bista riba con e fenomeno ta manifesta na Corsou. A base di e investigacion aki nan no traha un plan unda asuntonan manera señala, registra, monitor, maneho, ley, cuido, ayudo, investigacion policial y persecucion ta para central.