E situacion aki no ta normal, mi tin 27 aña trahando como Polis y nunca di mi bida mi a yega di mira algo asina”, tabata palabranan di Lito Lacle, vocero di Cuerpo Policial Aruba despues di a sali for di e cas situa na Tanki Flip unda tabatin un situacion inhumano, no higienico y peligroso tumando luga.
Diamars mainta e patruya di Noord tabata coriendo den vecindario di Tanki Flip, ora cu diripiente nan a haya un holo masha fuerte, pero specialmente desagradabel. Ora a check riba e cura nan a tuma nota cachonan den estado deplorabel. Mesora a bay Warda di Polis, a informa Fiscal, cu a duna ordo pa drenta e cas y haci mas investigacion.
Polisnan a constata cu den e cura tabatin riba 80 cacho, tur infecta cu sarna, sin lana, practicamente cuero riba weso, wowonan bashando y asina por sigui describi e panorama masha tristo y condenabel den cual ta cria e cachonan. Paden a topa un señora cu diferente enfermedad y cu hopi “uitslag” riba su cuero y tambe un yiu homber. Polisnan a dicidi pa detene e yiu homber aki, bou sospecho cu e ta neglisha su mama, mientras cu Ambulance a transporta e mama pa Hospital pa ricibi tratamento medico y pa diagnostica su situacion.
Den e cura di cas a topa cu decenas di saco di sushi benta na suela y den dje a topa cu cachonan morto den estado avansa di descomposicion. Esey probablemente tabata causa e holo desagradabel den henter e area. Pero paden e situacion tabata mas serio, pasobra e cas ta mita cu awa y coriente y mita di e cas no tin utilidad. Riba dje, a topa un freezer cu den dje mas di 15 cacho chikito morto gevries. Den un wea a haya un cacho cushina, no sa cu ki intencion y ni tampoco pa kende come.
“E situacion aki ta hopi teribel, algo nunca bisto na Aruba”, tabata impresion di e vocero di Polis cu a keda asombra pa e forma inhumano cu e famia aki ta bibando aden. Servicio Veterinario no por a haci nada mas cu pone e cachonan drumi, debi na nan estado debil y e malesanan cu nan tin y e risico mucho grandi pa contagia otro bestianan of te hasta hendenan den bario cu nan malesanan.
Cuerpo Policial a bay cu mas di 10 Polis na e sitio pa atende e caso aki, mientras cu Servicio Veterinario a yega cu un grupo di 3 pa 4 persona pa pone e bestianan drumi.
E investigacion lo continua, pa mira te con leu lo persigui e yiu homber aki. Tambe lo mester dicidi kico lo sosode cu e establecimento mes, cu den pasado tabata un “Hotel pa Cacho”, pero cu awor a bira mas bien un santana di cacho y en todo caso no un luga cu lo bo hiba bo cacho si acaso bo ta sinta bestia.
Fuente: comunicado KPA
