(CNN) – Direccion Antisecuestro y Antiextorsion di Polis di Colombia diasabra ultimo a ehecuta 152 orden di captura durante un operativo simultaneo den e principal ciudadnan di Colombia contra miembronan di e gruponan criminal Tren de Aragua y Clan del Golfo.
Director di Polis, Elver Vicente Sanabria, a comenta na prensa cu nan a logra confisca 450 dispositivo electronico, cu segun el a sigura, “ta bay ta fundamental pa otro procesonan investigativo.” Tambe a papia tocante confiscacion di 400 arma di candela, explosivonan y material di guera.
Tren de Aragua ta categorisa como e grupo criminal mas grandi y poderoso di Venezuela, di acuerdo cu rapportnan di organisacion Insight Crime y Gobierno di Merca.
Insight Crime ta agrega cu e origen di e mega grupo aki, cu tabatin su base na prison di Tocoron, ta bin for di 2005 cu sindicatonan di obreronan cu tabata traha den e construccion di un proyecto di trein cu lo a uni e estadonan di Aragua cu Carabobo.
Di acuerdo cu e rapport di NGO, e sindicato a cuminsa cobra pa asignacion di puestonan di trabou y tabata extorsiona companianan di contractnan na cambio di siguridad, den transcurso di tempo nan a amplia nan actividadnan.
Di su parti, Clan del Golfo, ta un grupo criminal Colombiano dedica na narcotrafico y extorsion, cu segun Polis Nacional, “ta un di e organisacionnan mas peligroso di crimen transnacional.”
Transparencia Venezuela ta splica cu e organisacion ta dedica na extraccion ilegal di mineral, trafico ilegal di droga, di arma y otro materialnan, tambe nan ta cobra e presonan cu ta den cada prison, nan ta horta, ta secuestra hende y ta trafica personanan.
E ultimo delito aki tanto e NGO aki como Insight Crime ta señala cu e expansion di Tren de Aragua tambe ta debi na migracion di miyones Venezolano pa otro paisnan.
