Un cos cu sindicato IOWUA (Independent Oil Workers Union of Aruba) tin bon cla, y cu nan a yega di expresa na gobierno caba y particularmente na minister di Labor, Glenbert Croes, ta cu Citgo Aruba Refinery (CAR) no por bay ‘zomaar’ di Aruba dia 31 di januari awor. Principalmente sin cumpli cabalmente cu su compromisonan cu e tin cu su trahadonan y cu pais Aruba.

Citgo mester cumpli.
Informacion cu a yega cerca IOWUA ta indica cu Citgo kier pone placa riba un cuenta, y bay for di Aruba, practicamente ‘bandonando e barco’, segun Anthony. Den e caso aki IOWUA a pidi cooperacion di gobierno tanten cu Citgo no cumpli cu su obligacionnan, y no caba di negosha cu e trahado. Pero principalmente cu e trahadonan por haya algo rasonabel, gobierno no por laga Citgo bay for di nos isla.

Tambe ayera e sindicato aki a yega di manda un carta pa USW (United Steelworkers), caminda IOWUA ta afilia na dje hunto cu e demas sindicatonan grandi cu ta representa casi tur e refinerianan na Merca, entre nan Citgo. IOWUA a pidi USW pa manda un carta pa Citgo, pa e compania aki cumpli cu e contract colectivo (CAO) cu tin vigente cu e trahadonan. Pero tambe pa Citgo cumpli cu gobierno y Aruba. E mesun carta cu nan a manda pa USW, tambe IOWUA a mand’e pa prensa Mericano. E siman aki e ta consider’e crucial, ya cu decision mester cay.

Reunion cu Citgo.
Pa atende cu e situacion aki, presidente di IOWUA, Boy Anthony a informa cu tanto nan sindicato como FTA a dicidi di uni pa nan pidi un reunion cu Citgo via Mediador di Gobierno. Di un banda, IOWUA ta representa e trahadonan gewoon, FTA ta representa e trahadonan di staf y tin e grupo di trahadonan top manager local.

Tambe IOWUA a pidi minister di Labor pa director di departamento di Labor lo ta presente den e reunion aki. El a bisa cu e proposito di e reunion aki ta pa ‘mustra Citgo cu e no por bay zomaar, sino cu nan tin cu cumpli’.

Anthony a indica cu manera ta conoci, Citgo no a cumpli cu ley di Aruba di paga belasting, cu ta un compromiso cu nos tur tin, y tampoco nan a paga Refineria di Aruba (RdA). Gobierno por ta flexibel pa Citgo no paga belasting, pero si mester cumpli cu su compromiso cu e trahadonan y contratistanan directo.

Citgo tin placa.
Tambe presidente di IOWUA a referi cu na januari di aña pasa e trahadonan directo a bay. E tabata un grupo di 56 trahado cu a haya un bon pakete di retiro. Mientras cu aworaki CAR ta ofrece e trahadonan e minimo cu tin pa e trahadonan, esta cesantia. Pa IOWUA esaki ta inaceptabel, ya cu nan ta consider’e como un discriminacion. El a bisa cu e trahadonan cu a keda a sigui funciona y traha, pues nan merece a lo menos igual.

Sinembargo Citgo ta keha cu no tin placa pa ofrece un pakete igual di retiro. Pa presidente di IOWUA, esaki no ta un argumento of excuus di peso. Ya cu e ta referi cu si no tin placa, e ehecutivo grandi di Citgo no lo haci uzo di Tierra del Sol pa biba y menos nan lo uza auto costoso. “Si bo no tin placa bo no ta biba den Tierra del Sol. Kiermen e flit no ta subi,” el a declara na e matutino aki. E ta haya cu Citgo tin placa, pero e problema ta cu ‘bo no kier paga’.

Anthony ta spera cu nos tur ta uni pa atende cu e situacion di Citgo na Aruba. Te ainda IOWUA no sa cuanto trahado lo keda, ken di nan exactamente y/of si tin un operador nobo interesa, pero e ta haya cu e puntonan aki ta bin despues. E ta haya como un prioridad aworaki pa nan cera cabes como sindicato y pone maximo presion riba Citgo. Cada grupo di trahadonan tin nan respectivo abogado y nan lo busca un strategia, segun ley di Aruba, pa pone presion riba Citgo. Ya cu si nos ta na Merca, Hulanda of cualkier pais di mundo, nos tin cu cumpli cu ley di e pais.

Pa presidente di IOWUA mester crea un precedente, pasobra si nan ta acepta e situacion aki cu Citgo di no respeta nos leynan y gobierno, den futuro cualkier compania y multinacional of cualkier doño di hotel grandi ta bini, y ta haci mescos cu nos, ‘pasobra nos a lag’e pasa’.

E no ta kere cu pa e simpel echo cu nan ta un multinacional of un cadena grandi di hotelnan, nan ta kere cu por bin haci y deshaci riba nos isla.

 

LEAVE A REPLY

Please enter your comment!
Please enter your name here