Home Regional Cuba: Detencion y deportacion di ex-presidentenan di Bolivia y Colombia

Cuba: Detencion y deportacion di ex-presidentenan di Bolivia y Colombia

256

Bogota/Habana (Fuente: NTN24/ElTiempo) – Ex-presidentenan Jorge Quiroga y Andres Pastrana, di Bolivia y Colombia, respectivamente, a keda deteni diaranson pa autoridadnan di emigracion na aeropuerto di La Habana, Cuba.

E dos personanan, cu ta miembro di e iniciativa democratico di Spaña y paisnan di America, a sali for di Bogota pa ricibi e premio Oswaldo Payá, galardon entrega pa e red Latino Americano di hoben pa democracia. Riba su cuenta di Twitter Pastrana a laga sa di e asunto, sin duna detaye: “Cu e ex-presidente @tutoquiroga nos ta deteni pa gobierno Cubano na aeropuerto di La Habana.” Den oranan di atardi autoridadnan, despues di detencion pa varios ora, a dicidi cu nan no ta admiti nan na e pais y a deporta nan.

Ex-presidente di Colombia Andres Pastrana a bisa despues den e programa La Tarde di NTN24 cu “ autoridadnan di Inmigracion a bisa nos cu no ta admiti nos na e pais, y cu nan ta deporta nos, di regreso pa Bogota.”

Pastrana a conta cu nan a tene nan den “den un camber chikito cu presidente Quiroga a describi como un studio chikito di television unda pa mas di un ora y mey nan tabata graba tur nos movementonan.”

Tocante su detencion y deportacion Pastrana a opina cu “e ta contradictorio pasobra presidente Raul Castro a pidi un par di ora prome pa nan habri porta na Lima pa Nicolas Maduro, representante di e narco-dictadura manera mi a yam’e caba, y poco ora despues e ta prohibi dos ex-presidente eligi democraticamente entrada na Cuba. Esey ta absolutamente contradictorio.”

Durante e prome edicion di e Premio Oswaldo Payá na 2017, e regimen Cubano no a gusta e iniciativa, cu nan ta considera di disidente, y a prohibi entrada di Luis Almagro, secretario general di Organisacion di Estadonan Americano, como tambe entrada di ex-presidente Felipe Calderon di Mexico.