Mirando cu te diahuebs niun compania interesa den e proyecto pa e Solid Waste Treatment Facility, a presenta niun proposicion, Minister Otmar Oduber a anuncia ayera cu a dicidi di amplia te dia 31 di juli e posibilidad di participa den e bid aki.

Apesar cu den e prome rond di e destaho publico aki niun compania a entrega cerca notario un proposicion pa participa den e bid di e proyecto di e insinerado grandi, Minister Oduber a laga sa cu alrededor di 16 compania a mustra un gran interes den e proyecto aki. Pero e mandatario ta argumenta cu tabatin companianan cu a pidi mas tempo, mirando cu ta trata di un proyecto compleho y di un gran magnitud.

Ministerio no a bin cu niun cambio prome cu e fecha di diahuebs ultimo a yega pa asina tin e transparencia cu no pa motibo cu un par di grupo cu tabata pidi mas tempo a amplia e destaho, mientras eventualmente tabatin otro cu si kier a entrega un oferta den e fecha stipula prome, nan a dicidi pa laga cu e ‘deadline’ di e destaho publico aki yega.

Fase Nobo
Awor Ministerio a inicia un fase nobo. Oduber a declara cu te dia 31 di juli awor e 16 compania aki tin oportunidad di mustra si tin interes pa participa den e proceso aki.

Diabierna ultimo nan a dirigi un carta pa tur e companianan interesa pa nan ta na haltura cu te dia 31 di juli pa mustra si nan tin un interes ainda pa entrega un oferta. Igualmente nan ta haya un periodo adicional di 90 dia pa cual nan por entrega nan oferta.

E mandatario a bisa na Bon Dia Aruba cu e condicionnan ta keda igual. “Pero loke nos a haci ta di haci hopi cla pa nan,” segun e mandatario.

Minister Oduber no kier adelanta su mes riba kico lo ta e plan B den caso cu niun compania ta participa den e destaho aki, manera a sosode diahuebs ultimo. Minister Oduber ta kere cu den e momento aki nan mester concentra riba e ‘deadline’ di dia 31 di juli.

E ta spera cu ‘pa bienestar di pais Aruba’ nan por haya e participacionnan necesario pa por yega na un solucion saludabel pa nos comunidad. Y si no ta yega na esey nan ta bay bek den nan seno di e team tecnico encarga cu e proyecto pa evalua kico e plan B ta bira. Pero e no ta kere cu ta un opcion pa papia riba plan B aworaki.

Den e condicionnan a wordo stipula -segun Minister Oduber- cu e maneho di desperdicio di sushi ta un tarea legal cu Serlimar tin cu carga. Den e caso aki e ta clarifica cu tur sushi cu ta wordo produci na Aruba, no ta importa e companianan cu ta recoge e sushi, pero e maneho di desperdicio di sushi ta den man di Serlimar. Den e caso aki nan por garantisa e compania cu ta gana e destaho aki cu tur e sushi di Aruba lo wordo re dirigi pa e planta aki como e unico sitio pa entrega e sushi y pa nan wordo maneha tambe.

Segun e mandatario den e combersacion cu nan a yega di sostene cu e compania interesa den e proyecto aki no a wordo pidi ni tampoco ofreci un garantia financiero di parti di gobierno. Solamente e garantia di e cantidad di sushi rekeri pa opera e insinerado. Tambe cu tur e sushinan ta bay cerca nan, y cu nan lo wordo asigna como e compania cu ta maneha sushi pa cierto cantidad di aña. Tambe cu WEB mester cumpra e energia cu e compania aki ta produci y cu WEB ta dispuesto pa haci esaki tambe.

 

 

LEAVE A REPLY

Please enter your comment!
Please enter your name here