Stichting Ja Ik Aruba ta un fundacion dedica na estimulo di desaroyo di talento pa mehora e participacion laboral y social di hobennan, adulto hoben y hobennan profesional, asina nan por haya e motivacion di traha na loke nan ta desea den nan bida.

Bon Dia Aruba a tene un entrevista cu Jalken Antonia cu a studia Accountancy y Business Economy, e ta fundado di Stichting Ja Ik Aruba y el a splica un aña pasa el a crea e fundacion na Hulanda y e programa ‘From good to GREAT’, cual ta tin como meta inverti den desaroyo di hobennan y hobennan adulto desde edad di 13 te 30 aña, el a comenta cu e programa ta dura ful un aña y cune el a logra guia mas di 250 hoben.

Manera Antonia a expresa, e programa aki ta dedica pa ‘comportacion y actitud’, awendia hopi companianan ta busca hende pa traha pero e hobennan mes no sa nan meta y loke nan por logra cu hopi dedicacion.

Di mesun manera, Antonia a señala cu e mes a skirbi cuater instrument y e aña pasa el a traha cu tres di nan, un ta ‘Inspiracion Tour’ unda Antonia hunto cu studiantenan a bishita cuater compania pa nan siña cu ‘mundo ta asina grandi y riba bo potencial bo no tin un limite’, el a sigura.

Tambe el a manifesta cu e compania mes ta wak con e comportacion di e studiantenan ta hopi importante, ki tipo di herment nan ta balora, cu cual mentalidad nan tin cu traha y cua actitud ta yuda nan pa por yega na unda nan mester yega.

‘E persona por tin un soño y esey ta great, pero mester traha di bo soño un plan y esey ta bira un meta y asina bo por tene’, Antonia a comenta.

Tambe el a manifesta cu un di e motibonan cu Aruba tin un porcentahe halto di hobennan cu no tin trabou, ta cu nan ta training pa traha añanan largo pero nan no tin actitud, nan ta wak e trabou como un custumber cu nan ta haci tur dia y door di esey e hende no ta logra nan meta.

E programa aki ta midi e ambicion di studiantenan, por ehempel, si un di nan ta bisa cu den futuro e lo kier bira director, esey no ta suficiente, nan mester bisa director di ki area, di cua compania, den cuanto aña e lo kier logra esey, tur e detayenan nan mester skirbi pa activa den celebro con pa yega eynan.

Den temporada di vakantie, e programa aki a ser adapta como un Summer Tour, cual ta encera un training di cuater dia di comportacion, actitud y liderazgo personal. Nan lo combina e teoria cu un tour den compania unda e participantenan mester practica lo cual nan a siña y asina midi unda nan ta para y na unda nan tin cu yega, na final di e tour lo sigui un analisis den grupo unda nan ta splica kico por siña y pone e parti teoretico y practico banda di otro.

El a informa cu esunnan cu a participa na ‘Summer Tour’ ta miho prepara pa nan estudio, ora di core stage of lo kier subi riba mercado laboral.

E training lo cuminsa awe pero tambe tin 3 fecha mas cu ta dia 29 di juli, 5 di augustus y 9 di augustus, cu un duracion di cuater dia cada un y un costo di Afl,- 240 pa cada participante, e persona interesa por haya informacion riba e pagina di Facebook di Stichting Ja Ik Aruba.

Pa finalisa, Jalken Antonia a bisa cu e hobennan mester desafia nan mes, mester tuma nan mes serio, mientras cu e mayornan mester comunica cu nan, scucha kico nan kier, apoya nan, manera el a sigura. “Mi ta ripara cu hobennan awendia tin hamber pa tin un bon futuro pero e manera cu nan ta haya les na Aruba y Hulanda tambe, esey mester cambia pasobra tur cos a cambia”.

 

 

LEAVE A REPLY

Please enter your comment!
Please enter your name here