Un di e testimonionan mas spera den e huicio di Johnny Depp contra e corant The Sun pa difamacion a yega: di su ex-esposa Amber Heard, ken a revela detayenan controvertido di su relacion cu e strea di Hollywood.

Abogado di e actriz, Jennifer Robinson, a bras’e pafo di corte na London, unda Heart a mustra sonriente.

Dialuna ultimo a inicia e presentacion di testimonio y evidencia relaciona cu Heard, ken den su declaracion di 39 pagina, publica ayera, a acusa Depp di menas’e di morto den varios ocasion, y di acus’e di tin relacion cu ocho di e actornan cu ken el a traha, incluyendo Leonardo DiCaprio.

Segun su testimonio, e actriz di 34 aña di edad a pensa cu e lo muri durante un atake den cual Depp a primi su nek y a bis’e ‘mi ta bay mata bo y tene relacion cu bo cadaver’.

Pero esey no tabata unico advertencia di Depp. “El a menasa mi cu morto hopi biaha”, Heard a señala.

Depp a inicia un huicio contra News Group Newspaper pa un articulo den The Sun den cual a tache di ‘batidor di esposa’, algo cu el a rechasa. NGN ta defende e berdad di e publicacion, sigurando cu e actor tabata controlador y abusivo cu Heard, principalmente na momento cu e tabata bou influencia di alcohol of droga, pa cual testimonio di e actriz por ta clave.

Segun Heard, Depp a bis’e cu e unico forma di scapa di su matrimonio tabata morto, y cu el a dal’e, scop’e, chok’e y hasta den un ocasion a tira un celular den su cara lo mas duro posibel.

Ademas di presenta su testimonio, Heard a ser interoga pa Eleanor Laws Qc, representante di Depp, y cune, e actriz a detaya e supuesto agresion cu a tuma luga na Tokyo pa motibo di un pelea tocante nan acuerdo prenupcial.

Ta spera cu den proximo dianan Heard lo responde na comentarionan di hende cercano na Depp, tocante si el a inventa acusacionnan di abuso domestico pa chantahe na momento di su divorcio.

LEAVE A REPLY

Please enter your comment!
Please enter your name here