Con leu Aruba ta pa logra e meta cu gobierno a stipula pa nos bira un pais auto sostenibel pa aña 2020? E ta un pregunta cu Prome Minister di Aruba sr. Mike Eman a contesta na Bon Dia Aruba bisando cu tur esfuerso ta wordo haci pa logra e meta aki. Un scenario cu e ta considera ideal pa analisa y evalua e meta aki ta Green Conference.
Den e conferencia aki nan lo bay habri un mesa di discusion ariba con nos pais ta bay yega na e di dos 50% di energia sostenibel. Ya caba nos ta riba un 30% y e mandatario ta calcula cu otro aña nos lo por yega na e prome 50% pa medio di e dos parke di molina di biento.
“E prome 50% ta basta cla caba. E di dos 50% tin hopi reto”, segun e mandatario.
E mandatario a declara na e matutino aki cu nos ta na porta pa celebra e conferencia menciona na fin di luna aki. “Na e momento ey nos lo tin otro momento importante cu nos por anuncia e avance grandi cu Aruba ta haciendo riba e tereno aki”, el a bisa.
Otro asunto cu lo wordo delibera den e conferencia aki tin di haber cu energia revocabel ta fluctua y ora bo tin un sistema nacional di energia cu ta depende di e energia aki e ta un reto. E mandatario a bisa cu e tecnologia cu nos pais lo bay uza pa por atende cu e retonan di fluctuacion di energia alternativo ta bay ta otro tema di discusion durante e conferencia aki. Ya cu expertonan mundial ta bin Aruba pa discuti hunto cu nos expertonan con nos pais ta bay introduci tecnologia, tanto den e parti di produccion como esun di e demanda pa bin cu stabilidad den e suministro di e tipo di energia aki.
Nos capacidad
E version di e Green Conference 2015 ta uno relevante te hasta crucial riba e meta pa nos pais bira auto sostenibel riba energia alternativa. P’esey e ta carga e titulo di “Learning Event”. E ta bay ta –segun sr. Eman – un learning pa tur e islanan cu ta bay bini pa por intercambia experiencia cu Aruba tin… Actualmente Aruba ta conta cu e sosten di Union Europeo y Nacionnan Uni riba e tereno di sostenibilidad.
Na e momento aki nos capacidad di energia alternativo ta ariba un 30%, segun e mandatario. El a trece dilanti cu e capacidad aki cu ta wordo produci di energia berde tin di haber cu diferente proyecto, entre nan: E parke di molina di biento na Vader Piet. Pero tambe e panelnan solar cu a wordo instala na aeropuerto y esunnan distribui rond di nos isla. Tambe e proyecto di Eco Gas cu e ta spera e aña ta bay conecta na WEB y otro aplicacion riba tereno di energia alternativa cu a wordo haci den cierto domicilio y industria.
E ta spera cu otro aña si tur cos ta cana bon, e di dos parke di molina na Urirama ta bay wordo instala. Unabes cu e proyecto aki lo bira un realidad nos capacidad di produci energia alternativa ta casi yega un 50%. Igualmente el a indica cu e proyecto di instalacion di panel solar ariba scolnan hunto cu e di dos parke di molina ta pone nos pais cu un capacidad di auto sostenibilidad di mas cu un 50% di energia alternativa.
