Empoderamento ta un palabra cu hopi hende a scucha ultimamente; empoderamento di muhe ta e proceso cu cual hende muhe ta adkiri un dominio y control mayor riba nan mesun bida, e circunstancianan cu ta rondona esaki y elementonan cu ta forma parti di dje.

Pa e motibo aki, ta necesario pa cada muhe por eherce nan rol desde nan autonomia, cu nan por tin influencia den e proceso di tuma decision, cu nan por opina, vota y ehecuta accion sin cu nan por ta discrimina.

Durante un entrevista cu Bon Dia Aruba a haci cu Queen-Anne Bergen, Evento y Marketing di Elite Productions, el a splica cu e ta parti di e organisacion Wow Aruba cu ta para pa “Women Empowering Women”, un organisacion cu ta yuda empodera e hende muhe. Tur luna e miembronan ta reuni pa haci actividadnan y programanan educativo hunto cu un speaker y asina tambe nan ta haya fondonan pa yuda e personanan mas vulnerabel na Aruba.

E obhetivo di Wow Aruba ta pa duna sosten y apoyo pa hende muhe por siña y apoya hunto. E ta duna e oportunidad pa desaroya y mehora e habilidad personal, social y profesional di cada un di nan. Ademas di esey, Bergen a manifesta cu ‘kico cu bo kier den bo bida, bo por’.

Di mesun manera, Bergen a duna di conoce cu dia 7 di september proximo na Alhambra Ballroom desde 8or di mainta te cu 1or di merdia, Wow Aruba ta organisa pa prome biaha e conferencia informativo ‘Dare to Be’ of ‘Tribi di ta’, enfoca riba e muhenan cu kier tribi di sigui e soño cu nan tin desde hopi tempo, tribi di ta imparabel, tribi di inverti den nan mes. Cu e evento aki nan por haya inspiracion pa actua sin ningun distincion di educacion of profesion.

E conferencia lo ta conforma cu e invitacion di varios speaker tanto local como internacional, dirigi pa hende muhe y pa hende homber cu lo presenta topiconan di actualidad pa un desaroyo personal y profesional.

Segun Bergen, e meta principal di ‘Dare to Be’ ta pa brinda studiantenan, recien graduadonan, hobennan profesional y cualkier otro persona cu ta desea di inverti den nan mes, un evento pa nan por disfruta di oranan di inspiracion pa accion den cualkier area di nan bida.

Bergen a bisa cu e programa di e conferencia ta interactivo y informativo. Como orador local experto den desaroyo di personalidad, Sharleen Tromp lo bay papia di con e personanan por descubri nan miho cualidad y con nan por utilisa esey den un miho manera pa avansa y asina por yega mas cerca di nan meta.

Gabriela Mueller di Suisa, lo bay ta un di e oradornan internacional invita y lo presenta, ‘Impact and Action, 5 Seconds Decisions’, e instrumento perfecto pa asumi retonan di decisionnan diario.

Frances Rios for di Puerto Rico, lo comparti su ideologia di ‘Ready, Set, Fly’ inspirando accion, desaroyando e personanan mes como un ‘game changer’, dispuesto y cla pa cualkier reto.

Tambe ta invita varios panelista, manera Tisa La Sorte -CEO y Presidente di AHATA, Rigo Croeze – hoben comerciante a cargo di legacia familiar Urataka Center, Gerlien Croes – hoben politico y consehero di maneho na Oficina di Relacionnan Europeo y Reino, Diana Salcedo -psicologo y director di Mind+, Marc Figaroa – director di Aruba Ports Authority N.V., Daniel Botero – experto internacional den Career Transition, Tristan Every – entrepreneur den e ramo di tecnologia y Larissa Bermudez – profesional den media y periodismo cu lo modera e panel durante e conferencia.

Bergen a splica cu loke nan kier ta pa e personanan por ta empodera pa tin e curashi di haci loke nan kier haci. “Hopi hende ta capacita pa haci hopi cos, pero no tur tin e motivacion of e confiansa pa hacie y esey ta un problema cu tur hende tin”, el a sigura.

Pa finalisa, Bergen a informa cu Wow Aruba tin planea un proyecto pa yuda hobennan mama adolescente of na estado, locual ta un problema social grandi cu Aruba ta padece, y asina por yuda e hende na diferente districto.

 

 

 

 

LEAVE A REPLY

Please enter your comment!
Please enter your name here