Ayera diamars, Nacionnan Uni oficialmente a cera su mision di paz na Haiti cu un preocupacion pa e crisis grave cu e pais ta atravesa, cu protestanan violento pa exigi e salida di e presidente, Jovenel Moise.
“E contexto actual no ta ideal pa e fin di 15 aña di operacion di mantenemento di paz na e pais”, e hefe di ‘helmet blauw’ di ONU, e Frances, Jean-Pierre Lacroix a admiti na e Conseho di Siguridad.
E organo maximo di decision di Nacionnan Uni na luna di april pasa a acorda un extension ultimo di seis luna, te cu dia 15 di october, pa e mandato di e mision – conoci cu e siglanan Minujusth – y cu na 2017 a crea pa substitui Minustah, un operacion hopi mas grandi cu tabata mas di un decada na Haiti.
Awor, e Minujusth cu ta enfoca riba e apoyo di mehora na Polis Nacional, lo reemplasa pa un mision di caracter politico, pafo di e mantenemento di paz di ONU.
E salida di e operacion ta produci den pleno crisis na Haiti, cu varios manifestacion multitudinario contra Moise, cu a causa na varios biaha sakeo, violencia y morto.
Haiti no tin un Gobierno efectivo desde maart pasa, pa via di e blokeo di e Parlamento di parti di oposicion, pero e situacion riba caya a complica desde augustus den respuesta pa e problemanan di desabastecemento di combustibel.
E corupcion, escasez di combustibel, hamber y insiguridad a aumenta e crisis, cu ta paralisa tur actividad na e region di Port-au-Prins y na otro ciudadnan di e pais desde casi cuatro siman pasa.
