Lotto pa Deporte a lansa un producto nobo. Lotto On line, unda e persona ta gamble online. Esaki ta habri lotto pa deporte su mercado ya cu no solamente hendenan local por gamble, pero tambe hendenan di pafo di Aruba tambe. Aunke e persona mester tin un cuenta habri na un banco local den caso cu e ta gana un premio.

For di diamars caba esaki ta accesibel riba www.lottoaruba.com unda bo ta click riba play now, y bo ta crea un cuenta pa participa den e weganan cu lotto pa deporte ta ofrece. E ta un manera adicional pa ofrece e productonan di lotto via smart phone, tablet, computer, etc.. of cualkier aparato cu bo por ta online cu ne.

Mirando cu e rebendedo eventualmente ta perde di gana cu e sistema aki, Damaris Ridderstap di lotto pa deporta a bisa cu manera tur producto nobo tin hendenan cu kier sa mas tocante e sistema nobo aki. Pero nan ta splica cu esaki ta un manera adicional cu no ta afecta e sistema tradicional di benta di lotto.

Ademas nan ta un grupo di hende cu lotto ta purba di target cu ta e hendenan cu ta cumpra cosnan online. E ta un grupo selectivo cu no tin nada di haber cu e re bendedo di lotto. P’esey nan no ta kere cu e sistema online aki lo afecta benta di e re bendedo. “Esaki ta un manera adicional pa haci compra di weganan di lotto”, e di.

Tin cumprado di lotto cu ta keda tradicional y nan ta fiel pa bay cerca e rebebedonan, y otronan ta prefera di haci tur cos via online, entre otro cumpra lotto via e sistema aki. Patrick Fortin kende ta encarga cu e parti di sales y mercadeo di lotto pa deporte a bisa cu nan lo mantene e sistema aki pasobra ‘e t’ey pa keda.’

El a bisa cu en general tur loteria tin e reto con nan por target e poblacion jong entre 18 pa 40 aña. E ta bira un issue pa nan con pa atrae e clientenan nobo aki den mundo di gamble, specificamente di lotto. E ta un forma pa conkista un mercado potencial cu lotto no tabata yegando cerca nan.

Sr. Fortin a bisa cu den pasado nan a yega di realisa algun encuesta relaciona cu weganan cu lotto pa deporte kier bin cu den futuro, unda Lotto On line ta un componente grandi di dje. El a splica cu e generacion nobo ta busca loke ta conveni nan. Pa añanan loteria a conoce e sistema tradicional di rebendedonan, pero paisnan na Europa y Merca cu a introduci benta online y a ripara cu esaki no a kita e benta tradicional. Mas bien esaki ta un forma pa complementa e negoshi di lotto su canal di benta.

“Awendia bo no por keda mas solamente tradicional. E tecnologia a haci cu nos mester adapta e negoshi cu bo ta ofrece e parti di e-commerce”, el a bisa. E contacto fisico cu e rebendedonan ta keda ya sea cu bo ta prefera di cumpra cerca nan. Of si bo ta gana premio abou di 3500 fls bo mester bay cerca un rebebedo. Tambe e benta online lo crea den futuro e brug pa e cliente aki bay cerca e rebendedo cu mester percura pa gana e clientenan aki.

Igualmente considerando cu Aruba ta un isla limita cu no ta crece hopi den poblacion lotto pa deporte no por ofrece mas kiosco. Nan mester bin cu e moratorio aki pa asina evita di perhudica e re bendedo existente caba.