Recientemente, Minister Endy Croes a reuni cu Sr. Edgar Croes y Sra. Stephanie Croes di EduCampus. EduCampus Aruba ta un estilo nobo di institucion educativo na Aruba cu a inicia den e luna di januari di aña 2020.
EduCampus ta brinda e alumnonan un structura combina di enseñansa, unda cu e alumnonan di 8 pa 18 aña ta haya les online y les fisicamente. Durante e reunion a haci entrega di e Jaarrekening 2021 di EduCampus. Nan a informa cu ta trahando caba riba Jaarrekening 2022 y lo entrega esaki dentro di algun siman. EduCampus ta enfoca tanto riba e hobennan cu talento pa studia, como e hobennan cu tin talento como atleta. EduCampus ta ofrece su alumnonan oportunidad pa studia riba nan mesun tempo.
E scol ta conta cu 214 alumno, cual 74 ta atleta di diferente deporte. EduCampus ta brinda e atletanan aki oportunidad di practica nan deporte den combinacion cu nan estudio, ya cu nan no ta mara na un orario fiho. E atletanan cu ta bishita e scol aki y cu mester prepara pa un campeonato, ta haya hopi oportunidad cu hasta por practica nan deporte parti mainta si ta necesario. E estudio aki ta acredita pa medio di Cognia, pues un alumno cu termina EduCampus por sigui su estudio na Merca of Hulanda.
Pa fin di april 2023 EduCampus kier lansa un otro programa pa e atletanan elite (Elite Athletes) cu tin cu competi mas duro pa cualkier campeonato. Nan recordnan como studiante ta bay den un database Mericano, SAA database, unda e scolnan na Merca por sigui nan desaroyo desde aya, pa analisa si por ofrece e alumnonan aki un scholarship.
Tambe, a informa cu nan ta traha cu un abogado di inmigracion, kende ta duna conseho riba e puntonan cu mester tene na cuenta conforme ley, pa asina evita cu e alumnonan aki perde oportunidad di haya nan Visa. EduCampus tin contacto estrecho cu e abogado aki cu ta duna conseho na e alumnonan di EduCampus cu ta desea di sigui eherce tanto nan estudio como nan deporte na Merca. Minister Endy Croes ta felicita EduCampus pa e bon trabou cu nan ta haciendo y ta desea nan exito!
