Recientemente Gabinete Wever-Croes a tuma e decision pa nombra “Sasakiweg”, esta e caretera cu ta cuminsa for di e crusada banda di Sun Plaza Mall y finalisa te cu e crusada na Malmokweg como “Avenida Nelson Orlando Oduber”. Sin duda cu esaki ta un bunita reconocemento na un gran politico y gobernante, Nelson Oduber kende a sirbi nos pais pa mas di 35 aña, tanto como diputado, parlamentario y Minister Presidente.

Pakico Avenida Nelson Orlando Oduber?
Tabata ex diputado sr. Nelson Orlando Oduber kende a percura na 1983 pa introduci e plan di infrastructura turistico, “Plan Sasaki”, caminda a percura pa mas di 100 hectar di tereno wordo desaroya pa construi facilidadnan turistico y cual plan a encera entre otro construccion di varios caretera nobo, entre otro e caretera principal for di Eagle te Malmok, conoci como Sasakiweg.

E vision di Nelson Oduber e tempo ey a resulta uno corecto y specialmente na momento cu refineria Lago a cera su portanan na 1985 y cu nos pais a dicidi di concentra riba desaroyo di e industria turistico, cual a lo largo a bira e pilar economico solido di nos pais. Debi na e Plan Sasaki aki den transcurso di añanan un gran cantidad di hotel, condominio, shopping mall, cinema, restaurant, supermarket, night club y otro actividadnan recreativo a ser desaroya den e area turistico aki. Pues Plan Sasaki tabata fundamental pa cu e infrastructura y desaroyo exitoso di nos industria di turismo den e añanan siguiente.

Mirando e hecho cu pa 35 aña largo e asina yama den boca di pueblo “Sasakiweg” nunca a haya un nomber oficial di parti gobierno, awor ta e momento propicio pa nombra e caretera principal aki na nomber di e gran Arubiano Nelson Orlando Oduber y esaki danki na su vision y determinacion pa cu Plan Sasaki.

Partido MEP ta gradici Gobierno di Aruba pa e decision aki y ta felicita Nelson Oduber y famia cu e reconocemento bon mereci aki.

E ceremonia oficial di cambio di nomber den Avenida Nelson Orlando Oduber lo tuma luga dialuna awor 19 di augustus 2019 na e luz di trafico banda di Guardian Group pa 6.30 di atardi.