Historia di obesidad ta mustra cu loke awor ta wordo considera un fuente di varios malesa, obesidad tabata un simbolo di status halto den cultura Europeo. Ademas den diferente cultura, gordura of sobrepeso tabata wordo asocia cu atractivo fisico, forsa y fertilidad.

Algun di e prome popchinan cultural conoci, manera e figuranan di Venus, ta estatuanan chikito cu ta representa un figura femenino gordo. Tambe obesidad tabata considera un simbolo di rikesa y status social den cierto cultura cu tabata come tiki of paisnan cu a sufri di hamber.

Sin embargo den cultura contemporaneo moderno, un curpa obeso ta wordo considera como no atractivo y diferente stereotipo negativo ta asocia cu hende gordo. Muchanan y teenager nan gordo, ta frecuentemente obhetivo di menasanan y ta wordo rechasa, te hasta pa nan propio mayornan y nan ta confronta un stigma social. Cantidad di hende ta sufri di obesidad, y el a bira un problema di salud publico.

Obesidad como un malesa

Den e añanan reciente obesidad ta wordo mira mas como un condicion medico, te hasta nan ta haci referencia na dje manera un epidemia. Obesidad ta un malesa cronico cu tin diferente origen cu por wordo preveni. E ta marca pa un acumulacion excesivo di vet rond di henter curpa, kiermen ora e reserva natural di energia warda como vet den curpa ta bira asina tanto cu ta pone e bida di hende den risico. Cada aña ta muri por lo menos 2.8 miyon hende como consecuencia di sobrepeso y obesidad.

 

Segun Organizacion Mundial di Salud (WHO), obesidad ta ora e BIM (Body Index Mass) cu ta un relacion entre haltura y peso di un persona, ta riba 30 kg/m2. Otro definicion di obesidad ta ora e midi di e abdomen ta mas cu 102 cm den hende homber y mas cu 88 cm den hende muhe.

Obesidad ta un factor di riesgo, kiermen un pre-disposicion pa diferente malesa mas tanto malesanan di curason, tension halto, diabetes tipo 2, apnea di soño, atake y celebral y osteo-artritis entre otro, tambe ta pre-dispone na malesanan di cuero y di tripa. Di mesun manera e risico ora un hende gordo ta pasa den un operacion of den parto, ta mas halto cu den hende cu peso normal.

Un persona gordo tin mas peliger pa su pulmon nan daña, su sistema hormonal hopi biaha ta drenta den desbalansa y tin mas chens de saca proteina dor di su orina.Aunke e obesidad ta un condicion clinico individual, esaki a converti den un problema serio di salud publico cu dia pa dia ta bira mas grandi. E indice di mortalidad ta subi proporcional cu e gordura, kiermen cu un persona cu obesidad morbido (peso relativo mas cu 200%) e aumento di e mortalidad ta 10 biaha mas halto.

Estilo di bida

Mayoria di estudio di investigacion a demostra cu e combinacion di mal alimentacion y comemento excesivo hunto cu un estilo di bida keto, ta e principal causa pa hende bira obeso.Aunke tin cantidad di informacion tocante nutricion den scol nan, consultorionan medico, internet y sitionan di benta di cuminda, ta evidente cu e ta sigui un problema social. Por ehemplo e comemento di fast food a bira tres biaha mas entre 1977 y 1995 y e consumo di caloria a bira cuatro biaha mas halto.

Pero no solamente e comemento di mas ta e causa pa splica e aumento asina grandi di nivelnan di obesidad rond mundo. Un estilo di bida sin ehercicio tambe ta hunga un rol hopi importante. Tambe tin otro causanan cu no tin di haber cu mal habito di alimentacion sino clinico manera e malesanan endocrino hypotiroidismo, Cushing syndrom, lesion di hypotalamo of deficiencia di hormona di crecemento.

Tambe tin cierto malesanan mental cu ta pre dispone na obesidad, manera e transtorno di alimentacion bulimia nervioso of consumo compulsivo di cuminda of adiccion na comemento. Tambe algun tratamento medico manera esteroide of algun remedi pa fertilidad por causa ganamento di peso.

E herencia y genetica ta hunga un rol tambe. Mescos cu diferente condicion medico, obesidad ta wordo desaroya dor di combinacion di factornan genetico y ambiental. A wordo demostra alteracion den algun gen cu ta controla e gana di come. E metabolismo cu ta pre dispone na obesidad, aunke toch e condicion ta rekeri un comemento grandi di caloria.

Esaki a wordo demostra den un estudio cu 540 mucha adopta, unda a demostra cu a pesar cu e mayornan por ta obeso e muchanan adopta no ta mustra esaki. Esaki contrario na otro estudionan cu ta mustra yiunan biologico obeso, caminda un of e dos mayornan tin sobrepeso.