Siman pasa Parlamento a trata Presupuesto 2020. Debi na e efectonan di COVID-19 Gobierno a presenta cambionan na e presupuesto manera esaki a keda manda pa Parlamento anteriormente. E presupuesto a cambia drasticamente caminda nos por menciona cu entradanan di Pais Aruba ta bay cay atras y gastonan ta bay bira mas grandi creando un deficit financiero di 1300 miyon florin na luga di un surplus di 46 miyon florin den e concepto original.

Tromp-Lee ta indica di tin elogio y un aprecio enorme pa con Gabinete Wever-Croes, asisti pa nos profesionalnan di Directie Financien, Directie Economische Zaken, CBS y Banco Central, den un tempo hopi corto por a haci e scenarionan visibel di e impacto financiero y economico di COVID-19 (Coronavirus) pa nos pais. Esaki banda di tur e atencion rapido y necesario cu Gobierno y crisisteam desde un principio a bin ta  maneha e problema di Coronavirus riba su mes.

Gobierno a demostra cu ta tuma pasonan segun prioridad pa enfrenta e crisis aki y a informa Parlamento cu nan ta bay tuma e stapnan necesario a base di tres fase. Awor cu nan a haci e efectonan di e crisis visibel (fase 1), Gobierno di Aruba mester bay busca e fondonan necesario (fase 2) pa entre otro brinda alivio na esnan perhudica y na comercio, y na mes momento pa por garantisa cu nos fondonan di SVB, AZV y Gobierno por keda draai. Simultaneamente Gobierno ta bay actualisa e gastonan di gobernacion na e realidad nobo di nos pais, cual lo ta entre otro adapta gastonan di personal y gastonan di servicio y producto. Pa loke ta trata gasto di personal Gobierno a garantisa cu nan ta bay traha na un manera responsabel y cu mester sinta na mesa cu sindicato prome. Pa loke ta trata gastonan di servicio y producto ya caba instruccion a keda manda pa tur departamento di gobierno pa nan limita gasto.

Ayera Parlamento a aproba cu Gobierno por aloca 683 miyon florin pa brinda alivio na personanan cu a of lo perde trabou of entrada door di COVID-19 (214 miyon) y tambe pa por brinda alivio na negoshi chikito y mediano (40 miyon). Demas 429 miyon florin ta bay pa cubri deficit di e sistema di siguridad social cualnan ta SVB y AZV.

Bou un presion enorme, caminda Aruba ta pasando den un crisis sin precedencia, atendiendo debidamente cu e situacion di coronovirus, Tromp-Lee ta haya cu ta di ta admira con Gobierno ta tumando e pasonan necesario y ta actuando diligentemente.

1 COMMENT

  1. Tromp Lee: danki pa bo sonrisa: nos tin necesidad di hende cu kier sonrei, hende cu por yiudanos mira p’adilanti, despues di e crisis aki. Nos tin mester di bo sonrisa. Daki.

LEAVE A REPLY

Please enter your comment!
Please enter your name here