Varios video riba medionan social ta parce mustra ora cu forsa di siguridad di Iran ta tira municion y gas lagrimogeno pa stop protesta ocasiona pa rabia pa motibo di accident di avion Ucraniano cu Iran a tira y cu kier ‘sconde nan rol den e tragedia’.

Disturbio ta produci memey di tension entre Washington y Teheran cu a aumenta temor pa un guera entre e dos pais despues cu un atake aereo Mericano a mata general Irani Qassem Soleimani.

Iran a contesta cu un atake di misil balistico contra dos base cu ta aloha tropa di Merca na Irak, sin herida hende. Despues accidentalmente a ‘dal abou un avion’ mientras tabata preparando pa un contraatake Mericano cu nunca a yega.

Videonan manda na e Center for Human Rights in Iran basa na New York y despues verifica pa AP ta mustra un grupo di manifestante cerca di Azadi, of Freedom Square, huyendo mientras un bleki di gas lagrimogeno ta cay den nan cercania.

Hefe di polis di Teheran, general Hossein Rahimi a nenga cu polis a cuminsa tira. “Polis a trata e persona cu a reuni cu pasenshi y tolerancia”, medionan Irani a bisa citando Rahimi.

Sinembargo, agencia di noticia semi oficial Fars a informa cu polis a tira gas lagrimogeno den algun area. Guardia ta acusa di tira riba manifestante durante olanan di protesta anterior, incluyendo despues di aumento na prijs di gasolin na november, tempo cu mas di 300 persona a muri den un accion di represion, segun a reporta.

Ebrahim Raisi, hefe di poder hudicial di Iran, a emiti un advertencia na manifestante, bisando cu agente di Merca y agente di pais stranhero kier usa nan rabia pa e desaster di avion pa compromete e siguridad di Iran. Iran usualmente ta culpa protesta anti-gubernamental riba conspiracion stranhero.

E accidente di avion di Ukraine International Airlines marduga di diaranson a costa bida di 176 persona cu tabata abordo, principalmente Irani, Irani-Canades.

Durante tres dia, trahado Irani a descarta cualkier atake riba e avion, sugeriendo cu e accident di vuelo 752 tabata causa pa un fayo tecnico. Diasabra, autoridad a reconoce cu nan a basha e avion abou, ora cu prueba tabata acumila y lidernan occidental a acusa Iran di culpabilidad.

Pueblo Irani a expresa su rabia pa e atake riba e avion y splicacion di funcionarionan halto. Tambe ta di luto pa e fayecidonan, cu ta inclui cantidad di hoben cu tabata studia den exterior.

LEAVE A REPLY

Please enter your comment!
Please enter your name here