Desde 5’or atardi te cu 8’or anochi Centro di Pesca Hadicurari a introduci su happy hour di tur diabierna caminda nan tin musica bibo cu Francis Jacobs na “Nos Clubhuis”.
Biologo Marino sr. Byron Boekhoudt di Centro di Pesca Hadicurari a bisa cu generalmente nan ta haci un “gettogether” cu e piscado tur diabierna pa asina nan celebra e siman di trabou y e comienso di otro, caminda bo por tende cosnan mas profundo di piscamento y nan problematica.
Preocupacion
E ta haya cu e piscado ta traha duro ya cu nan ta traha riba lama hopi ora largo unda e combersacion no t’ey. Pero ora cu nan ta bin tera nan kier combersa hopi, unda nan ta expresa nan mes. Un preocupacion cu nan tin ta cu Aruba ta bin desaroyando hopi rapido durante e ultimo decadanan y nan ta sinti e presion aki constantemente.
“Nan ta sinti cu nan luga ta bay perdi”, el a bisa. Ademas episcanan ta birando mas scars cada biaha y nan tin cu bay mas leu pa pisca. Nan ta preocupacionnan cu ta biba diariamente cerca e piscadonan.
Ademas nan tin manera un fobia y miedo pa leynan cu constantemente ta bin di afo ta wordo imponi riba nan sin nan participacion y decisionnan. El a indica cu esaki ta puntonan cu e fundacion ta percura pa sali pa e piscadonan y scucha nan pa representa nan di e forma mas miho posibel.
Leynan y proteccion
Sr. Boekhoudt a declara na Bon Dia Aruba cu Centro di Pesca Hadicurari ta percura pa brinda e piscadonan tur ayudo. Considerando cu e centro aki ta practicamente hinca entre e hotelnan grandi y luhoso; Centro di pesca Hadicurari tin cu “negosha” un tiki riba e tradicion di piscado den e centro aki.
El a bisa cu e mesun bista nan tin pa Spaans Lagoen y na waf di Rancho na Playa cu ta miembro di e Centro Hadicurari. El a señala cu e fundacion aki semper ta boga pa conservacion di medio ambiente pa tin mas proteccion y bin cu mas ley integral. “Bo no por keda haci maneho di crisis so, ya cu bo tin cu tuma e cos na su totalidad”, el a bisa. El a reconoce e labor cu fundacion Aruba Reef Care cu pa hopi aña ta boga pa proteccion via leynan di nos bida marino. Tambe riba zonificacion di areanan protegi. Esaki kiermen cu tin otro areanan cu bo realisa bo actividad di pesca libremente pa trece un balans.
E aña aki pa medio di Aruba Reef Care nan lo bin cu campaña mas fuerte pa reduci e consumo di plastic. No solamente saconan di plastic sino otro articulo manera cuchara, forki, etc… traha cu plastic. Durante nan accion di limpiesa e tipo di producto di plastic ta esunnan cu mas ta resalta locual ta un problema grandi pa nos bida marino. “Ohala cu nos por haya mas reglanan pa proteccion di bida marino”, el a bisa.
