Bon Dia a topa polis banda di caminda den bario di Bushiri y a pensa cu algo tabata pasando pa motibo cu a mira 5 polis subi riba auto bieu bandona riba un tereno y tabata parce cu nan ta buscando algo. Sinembargo, ora cu a bay papia cu e polisnan, a resulta cu nan tabata ocupa cu algo completamente otro.
sr. Habib Gonzalez, Agent Eerste Klasse KPA, hunto cu su klas di 2012 ta ocupa cu un proyecto titula ”Auto Wreck”.
”Mirando cu tin hopi hende ta dump nan auto bieu riba caminda publico cual ta trece hopi sushedad, malesa y daño na nos medio ambiente y mirando cu nos tin e tema di medio ambiente pa finalisa nos aña escolar, nos a dicidi cu nos ta bay cuminsa revisa den playa pa nos ruim op mas auto cu ta posibel y aporta pa cuido di nos medio ambiente” ,sr. Gonzalez ta conta Bon Dia.
Esaki no ta prome biaha cu ta haci e tipo di proyecto aki y no lo ta e ultimo tampoco. E grupo actual ta consisti di cinco agente policial cual ta Habib Gonzalez, Elvis Perez, Kendrick Werleman, Joshua Kelkboom y Chariselle Maduro.
”Esaki ta un problema hopi grandi, e ta daña e santo, trece holo stinki y sangura , gewoon hopi sushedad y ora hende ta mira sushi nan ta keda dump mas sushi riba dje anto esey ta e motibo dicon nos ta bay cuminsa cu e action aki” sr.Gonzalez ta splica.
Ta bay tira bista den cercania di cas di pueblo y tur otro caminda cu e tipo di situacion aki ta andando. Esaki ta un proyecto cu ta bay dura 6 siman pa nos rond af kico ta e problematica y presenta esaki na scol pa tin un miho vision e ora ey den futuro. Nos ta districto uno di Oranjestad, si cualkier persona cu ta biba den un bario cu tin hopi molester di autonan asina, nan por tuma contacto cu warda di playa y puntra pa Sabayo y e lo avisa nos persona pa tira un bista wak con e situacion ta y tambe pa haci test di aire y controla tur otro cos manera problema di criadero di sangura y mas.” sr. Gonzalez a bisa.
