Banda di e detayenan di presupuesto 2021 mes, e documentonan entrega na Parlamento siman pasa ta duna tambe un proyeccion multi-anual pa loke ta desaroyo economico y loke esaki tin como consecuencia pa entrada di gobierno den e proximo añanan.

E proyeccion presenta ta parti tambe di e instrumentonan cu Aruba mester, pa por planifica nos propio desaroyo, pero tambe pa por presenta na Hulanda, den cuadro di e cooperacion y supervision financiero.

Un punto interesante ta cu gobierno tin gastonan di personal proyecta pa mantene e mesun nivel cu di 2021, cu ta Afl. 430,8 miyon, cu na su turno ta 11 miyon menos cu 2020 (Afl. 441,8 miyon). Esaki ta alrededor di Afl. 34 miyon bao di maximo acorda cu Hulanda den e protocol di 2018 (Afl. 479 miyon) y ta segun gobierno efecto di e -12,6% di reduccion di salario cu a introduci aña pasa. Esaki ta implica cu, sea no tin espacio pa aumenta salario di funcionario publico, o ta crea espacio a traves di un reduccion di e cantidad di cupo di trabao cu tin. Mirando e intencion di e plan di reforma cu a acorda cu Hulanda, e espacio (limita) pa mehoracion di salario lo mester bin di e restructuracion di e aparato publico.

Otro tema interesante ta por ehemplo cu entradanan di gobierno pa 2021 (mira Tabel 1) lo ta un poco menos cu 2020, y ta bay di Afl. 1.062 miyon pa Afl. 1.038 miyon. Den e siguiente aña, 2022, ta anticipa un recuperacion fuerte, cu ta keda expresa den un aumento di GDP di 2021 pa 2022 di casi Afl. 1,2 biyon (di Afl. 4.277 miyon pa Afl. 5.475 miyon). Esaki ta supone un crecemento di 28% di GDP nominal na 2022, un cifra bastante halto, tumando na cuenta e incertidumbre cu tin ainda den economia internacional y en especial esun di Merca. Den GDP nominal ta anticipa un regreso na nivel di 2019 na 2023, cu un GDP di Afl. 6.077 miyon. Den su relato preliminar reciente IMF ta anticipa un regreso na nivel pre-Covid den GDP real te na 2025. Mas detaye di presupuesto 2021 lo sigui den e proximo edicionnan di Bon Dia Aruba.

LEAVE A REPLY

Please enter your comment!
Please enter your name here