Pakico MEPORED ta bay hacie anto? Metemento di politica partidista den enseñansa?
E discusionnan den y pafo di Parlamento riba e ley pa monopolisa procesamento di sushi na Aruba y di cumpra un forno pa kima sushi di mas cu 300 miyon florin, riba su mes a bira superfluo, pasobra tur argumento racional ta contra di e proyecto aki. Pa haci e discusion ainda pio, gobierno y fanaticonan ta pone presion riba dos miembro di e coalicion pa nan tambe vota na fabor di e ley, pasobra ni den coalicion tin un mayoria na fabor di e ley aki.
Den e bay bin y discusion den coalicion riba e ley di incinerator, e partido RED a pone dos condicion pa por bay di acuerdo cu e ley. Kiermen cu e partido RED no ta di acuerdo pa motibo cu e ley ta malo pa Aruba, of pa motibonan di principio. Por ehempel, cu e idea di kima tur sushi den e forma cu tin planea, ta contra di e principionan di un ‘economia circular’, pasobra e ta destrui e circulo di ‘re-duci, re-cicla y re-uzsa’ cu menos contaminacion posibel. E incinerator ta kima casi tur cos, no ta resta nada pa recicla y e ta produci gasnan cu ta masha malo pa salud di hende y pa naturalesa. Sabiendo tur esey, partido RED ta dispuesto pa bay di acuerdo cu e ley malo aki, a cambio di dos punto di campaña: legalisa marihuana y independisa scolnan publico. Interes di pais y di medio ambiente a bira cos di negocia a cambio di legalisacion di marihuana y pone scolnan publico bou di un fundacion.
Independisacion di scolnan publico.
Den historia di enseñansa a crea scolnan publico y duna gobiernonan democratico e tarea di duna enseñansa pa medio di scolnan publico, pa sigura cu tur mucha y tur hende enseñansa di calidad, independiente di nan religion, nacionalidad, rasa, sexo o posicion economico.
Si no ta pa e motibo specifico aki, gobierno no lo mester tin scol mes y cualkier otro organisacion o fundacion lo por a mantene scolnan, manera ta e caso. E ta pasobra gobierno ta e cuidado di interesnan general y enseñansa pa tur en particular, cu gobierno a haya e tarea aki. Ta pa motibo di e principio ey cu ta gobierno mes y niun otro tin e responsabilidad di mantene scolnan publico cu ta sigura enseñansa na tur hende sin niun excepcion!
Tambe nos constitucion ta garantisa trato igual na tur scol: catolico, protestant, publico y di cualkier otro signatura. Tur scol pa ley tin cu haya e mes un cantidad di subsidio for di caha di gobierno. Gobierno no ta permiti pa ley pa duna preferencia na un riba e otro. E pregunta ta anto, ta pakico gobierno kier independisa scolnan publico y hinca nan bou di un fundacion? No por ta pa spaar placa, pasobra tur scol mester haya e mes un placa: maestronan tin cu haya e mes un salario y beneficionan cu maestronan di otro scolnan. Tur scol tin cu cumpli cu e mes un leynan di calidad den enseñansa. Kiermen cu e motibo pa independisa scolnan publico tampoco por ta pasobra scolnan cu ta cay bou di un fundacion ta funciona mas eficiente of ta di miho calidad. Anto pakico ta insisti pa independisa scolnan publico anto?
E unico motibo cu por pensa riba dje ta cu gobierno kier crea posicionnan nobo pa nan mes of pa amigonan politico. Si esey ta e caso, anto gobierno lo actua contra di nos constitucion y lo ta bolbe haci mal uzo di su poder pa faborece amigonan politico. Esey lo nifica cu un di e poco institucionnan democratico cu ainda ta basta liber di metemento politico, lo bira victima di politica partidista.
Mientras nos mester ta ‘depolitisa’ institucionnan, tareanan y servicionan di gobierno, e maneho di gobierno di MEP POR y RED ta pa enseñansa tambe bira un instrumento politico partidista y victima di e politica di ‘friends and family’, djis pa satisface e sed pa poder di partidonan politico MEP POR y RED.
