Parlamentario Rocco Tjon (MEP) ta elabora un poco mas – den un comunicacion ricibi di e mandatario mes – riba e topico di siguridad na nos fronteranan. Sr. Tjon ta haya cu sistema di radar ta mas efectivo aworaki cu drone nan.

Adicional a enfatisa e preocupacion pa locual ta e idea di e mandatario actual pa intensiva lasonan cu Marina Real. E preocupacion aki a conduci na mas cu 20 pregunta cu a wordo haci por escrito na e mandatario actual, segun e comunicado.

‘Na aña 2004 Aruba a haya su prome radar y su segundo radar na aña 2005. E ta un secreto publico cu Hulanda nunca no tawata, un asina yama ‘voorstander’, pa Aruba tin su propio radarnan”, parlamentario Tjon ta enfatisa.

“Manera ta conoci, mantencion di ekiponan asina sofistica ta esencial. Sinembargo e gabinete di Mike Eman no a prolonga e contract di mantencion cu a vence na december 2009, net despues cu AVP a tuma mando. Mas condenabel cu e hecho cu no a prolonga e contract ta, cu no a percura pa mantencion tuma luga.”

Hulanda den un carta, fecha dia 8 di maart 2011 (kenmerk: 2011-2000074101) a dicidi, cu aprobacion di sr. Eman, (encarga cu Kustwacht) pa destrui e radarnan di Aruba, debi cu supuestamente nan ta den mal estado. “No ta mas cu logico cu nan ta den mal estado si deliberadamente no a percura pa mantencion tuma luga?”

Como un persona cu a encabesa e team di aresto y e unidad di crimen organisa, sr. Tjon sa di e balor agrega di e radarnan cu pais Aruba tawatin na nan disposicion. “E radarnan aki tawata percura cu por a intercepta basta boto cu na un manera ilegal tawata trata na drenta pais Aruba.”

“Nos mester actua aworaki y lamentabelmente no a scucha ainda e plannan pa amplia e flota di nos polis maritimo y percura pa mas pronto posibel nos tin na nos disponibilidad bek nos mesun radar.”

Proposicion y pregunta na e mandatario

Sr. Tjon, ta enfatisa cu ‘simplemente intensiva lasonan cu Marina Real no lo yuda resolve e situacion actual. Mester di amplia e flota di polis maritimo inmediato y adkiri mas pronto posibel nos propio radar’.

Ademas cu e mariniernan Hulandes no ta domina e idioma Papiamento, no tin e asina yama ‘lokalekennis’, ta cuestiona tambe e wettelijke grondslag pa encarga Marina Real cu tareanan policial. “Miho lo ta pa explora por ehempel posibilidad existente den cuadro di e ‘memorandum of understanding’ cu Merca pa loke ta trata technische bijstand den husticia. Insuficiente fondo no mag ta un excuus pa no por amplia e flota di polis maritimo de inmediato y adkiri nos propio radarnan.”

E mandatario actual durante e ultimo reunion publico a duna di conoce cu den ‘e criminaliteitbestrijdingsfonds tin riba 3 miyon florin disponibel y cu lo uza parti di esaki entre otro pa busca drone nan’.

Mirando e hecho cu drone nan no lo aporta pa eleva e siguridad na nos fronteranan (operacionalmente prueba), cu siguridad na nos fronteranan ta e prioridad aworaki, por medio di preguntanan por escrito e lider di fraccion di MEP ta cuestiona e motibo pa busca drone nan aworaki.

Un sistema di radar ta genera informacion prome cu botonan yega Aruba (preventivo) y un drone su flight time ta limita y lo ta represivo.

“A base di un sistema di radar por traha preventivo, a base di drone nan no. P’esey ta urgi e minister actual pa percura pa mas pronto posibel busca Aruba su propio radar bou maneho di Cuerpo Policial y amplia e flota di polis maritimo”, e parlamentario ta finalisa bisando.