Ayera mainta cu un margen chikito di un voto pero suficiente -segun Ley di Referendum- pa sindicato STA por a haya e mayoria di e votonan deposita pa e trahadonan di Aruparking pa representa nan.
Vice-presidente di STA, Sr. Reynold Vrolijk a expresa su satisfaccion cu e logro sindical aki. El a bisa cu e referendum a bay “basta bon” y di e total di 21 trahadonan cu mester a vota, a vota a vota 10 plus 1, aunke e ta un margen hopi estrecho, e ta refleha un mayoria.
E resultado aki ta duna STA e oportunidad pa nan por brinda un miho condicion di laboral pa e trahadonan di e compania Aruparking. El a bisa cu e preocupacion cu e trahadonan di Aruparking ta e parti di salario y tambe e orario di trabou. “Segun mi ta compronde esaki ta afecta nan hopi”, el a declara na Bon Dia Aruba.
E ta calcula cu alrededor di 30 trahado ta na servicio di e compania estatal aki afilia na Arubus. E sindicalista Vrolijk a indica cu STA lo realisa su trabou sindical awor cu nan ta drenta na e compania aki pa mustra e restonan di e trahadonan e beneficionan cu nan tin di pertenece na un organisacion sindical.
“Seguramente den futuro manera nos negociacion bay, mi ta kere cu poco poco nan lo uni cu e sindicato”, el a bisa.
Mediador di Gobierno, Anselmo Pontilius ta splica cu den e caso aki un total di 21 trahado a forma parti di esnan cu ta forma parti di voto. Di cual di e 21 trahadonan un total di 11 a presenta y cu a deposita nan voto. “Di 11 tabata net e 50% plus uno cu e sindicato tabatin mester pa representa e trahadonan oficialmente.”
Aruparking y Arubus
Mediador di Gobierno a aclaria cu a bin cu e referendum aki teniendo na cuenta cu e trahadonan di Aruparking no ta trahado di Arubus N.V. P’esey cu e referendum aki e partinan envolvi lo trata e parti formal di nan trahadonan cu ta independiente na esun di Arubus, ya cu e trahadonan di Aruparking tin otro dunado di trabou. Esaki aunke e compania Aruparking ta forma parti di e compania Arubus, e trahadonan aki tin otro acuerdo di trabou y nan tin otro dunado di trabou.
“Consecuentemente no ta automaticamente nan no lo cay tampoco bou contracto colectivo (CAO) di Arubus”, el a bisa.
