DTI (Dienst Technische Inspectie) ta conseha pa temporada di carnaval cualkier vehiculo di motor cu lo bay forma den e parada pa acudi na e departamento pa asina controla si tur cos ta den orden y pa tur hende tin nan keur. 

Director di DTI, Anko Koopmans a splica un poco di situacion cu tocante e keur di vehiculo ta acerca. Na 2019 nan a ripara cu solamente tres trekker y chasis di tres diferente grupo a bin keur. Nan spera cu mas lo yega mirando cu den parada tin mas ekipo ta core aden.

Nan a duna oportunidad pa nan por acerca den luna di november y december. Nan por acerca haci afspraak asina den sistema ta cla y por keur asina por ta trankil den e parada. Sinembargo esey no a pasa.

Dus nan ta spera cu pa cuminsamento di aña nan ta duna oportunidad pa hende por acerca pa asina keur, primordial esnan di carnaval. E parti importante segun team di control KPA ta keda pa check esey ora e vehiculo di motor bay den parada ‘ora nan ta aden pa check y ta sigur cu nan ta keur si no, mester actua’.

Koopmans ta splica cu un chasis y trekkers ta keur pa un aña. Nan ta ekipo nan pisa y cu ta wordo uza constante. Tin exigencia riba esey. “Esnan cu no a keur aña pasa, ta riba ruta di carnaval e aña aki sin keur. Tin compania cu ta lastra containers,e ta probable cu nan ta okay.”

Sinembargo no ta sigur cua ta esnan cu ta uza den parada. Pero e diferencia ta keda grandi pa persona cu ta bin keur. Nan ta haya UTV, ATV cu ta uza den parada. E ta remarca cu ni departamento di DTI no ta bay den parada y controla esaki.

E ta un parti cu polis tin pa wak kico ta pasando y check tur esey. “No por pone obligacion pa hende bin pero nan mester sa y bin di nan mes”, e ta expresa. Koopmas ta bisa si cu SMAC ta yuda den parti di duna informacion na grupo y persona cu ta participa den carnaval pa haci nan cosnan na tempo.

Pa cualkier persona of grupo cu ta participando den parada cu lo bin, Koopmans ta bisa cualkier persona por yega y nan ta pasa den e proceso di keur. E por ta posibel cu nan lo mester warda un tiki pero ta mas sigur asina pa check e sistema di brik y tur otro cos ta okay durante temporada di carnaval

Un punto cu e ta bisa cu ta importante di parti responsabilidad, ta cu riba caminda e cifra no cambia, cu tin mas di 40% di auto na Aruba cu no ta keur, e ta compronde cu pa auto nobo no mester haci’e dibiaha pero DIMP ta papia di 88.000 number di auto na Aruba anto cu 40% cu no a keur y ta core riba caminda.

Pa e departamento mes nan por spera di haci e sistema mas automatisa. E stap cu tin cu tuma ta rekeri placa y hende. “Nos ta purbando drecha servicio di keuring, wacht ruimte (sala pa warda) pero nos ta wak cu e ta bayendo miho.”

E proceso di documentacion tambe ta miho. Koopmans a comparti cu pa aña 2020 tambe ta bin e ‘cuenta di ARBO wet’, nan manera departamento ta moviendo pa asina tin un bista mas cla di esaki.

Sinembargo e ta expresa cu tur esey ta exigi tempo y nan lo bin cu forsa. Tambe lo purba cu DIMP exigi keur ora di pidi number, mescos ta exigi seguro, bisando cu ‘asina e samenwerking tin cu bay’. Sinembargo e aspecto aki lo ta trahando riba dje pa trece den futuro.

“Pa nos e no ta tocante placa, pero e ta bay pa siguridad di persona riba caminda cu ta core auto, truck of bus. E ta e siguridad di nos mes. Esey ta conta pa tur persona, hasta esnan cu ta transporta den car nnval of turista”, Koopmans a bisa.

LEAVE A REPLY

Please enter your comment!
Please enter your name here