Tema di refineria a cuminsa cansa hende…

Nos minister presidente ta bay riba un gira “pa haci un ultimo intento pa salba e refineria”. Segun e comunicado di prensa, ta bay bishita entre otro State Department y OFAC pa purba logra algo ainda pa reapertura di e refineria. Hipocresia? Of un biahe util cu por resulta den algo? Mesora a bin reaccion di un di e parlamentarionan di oposicion, e ex-ministro encarga cu energia, cu ta mustra riba e hecho cu den e plan strategico economico nobo pa 2019 – 2022 no ta ni toca e tema di e refineria. Esey e apreciable parlamentario ta haya malo, pasobra e semper a bringa pa e refineria keda habri. Esey ta su bon derecho, pero esaki segun nos ta carece naturalmente di cualkier tipo di realismo. Pero e tin razon den e sentido cu si bo no ta contempla e refineria den bo plan di desaroyo economico pa e proximo añanan, anto kico ta e sentido pa ‘haci un ultimo intento’? No ta miho anto pa papia ‘loud and clear’ y bisa Aruba den cual direccion nos lo bay?

Den e sentido aki nos tampoco ta comprende kico ta e importancia di e biahe aki, sigur pa usa palabra asina pisa di ‘mustra riba importancia’ cu e refineria lo tin pa nos economia. Ademas, kico State Department y OFAC ta bay haci awor ainda pa rebiba e proyecto di e upgrader? No ta algun tempo pasa caba cu a bay Merca pa papia caba cu OFAC y a bolbe cu un aire di triunfalismo cu un excepcion riba e prohibicion di haci negoshi cu Pdvsa (e famoso license 7-A) cu supuestamente lo tabata e documento ‘magico’ pa pone e asunto di e refineria cana? Poco dia despues a bin e golpi, ora a haya sa cu e dirigencia nobo di PDV Holding y su subsidiarionan na Merca, cu a pasa pa man di Guaido y su hendenan, no tin ningun intencion cu e proyecto na Aruba. Hasta nan a bin cu e noticia di e suma grandi di placa cu a somenta den e proyecto, loke realmente ta sclama pa un investigacion profundo. Sin embargo, nos no sa si e suma ey a somenta aki o na otro pais, o den trafico financiero entre pais, pues laga nos abstene di un opinion te cu bin claridad riba e asunto aki.

E motibo principal pa cual nos ta haya cu henter e asina yama ‘ultimo intento’ aki no ta necesario, ta pasobra e problema no ta un problema di awe, cu por resolve kitando e obstaculonan cu apenas a surgi fin di aña pasa, y mas ainda den e prome lunanan di e aña aki. E problema no tabata e sancionnan, pasobra tin e posibilidad pa e entidadnan Mericano dentro di e consorcio Citgo/Pdvsa opera y transferi fondonan necesario entre nan. Nunca tabata e idea di e sancionnan cu e parti Mericano lo a sufri. Pero, e punto ta cu e proyecto na Aruba ta un caso apart. Pa cuminsa caba pasobra e ta un proyecto tramita cu gobierno Chavista, cu no ta preocupa pa laga e parlamento aproba e cosnan cu gobierno ta haci, cu pa ley mester aprobacion di Asamblea Nacional, e asamblea cu Guaido ta presidi. Anto awor nos mester spera di Guaido pa aproba un proyecto cu nunca a pasa su parlamento pa aprobacion? Claro cu e no tin ningun prioridad pa nan!

Pero esey no ta tur. Manera bisa anteriormente, e refineria no ta un problema di ultimo tempo. Ya ta mas di 6 aña pasa cu el a cera su porta y e tempo ey caba e tabata un refineria manca, cu tabata produci solamente loke ta yama ‘intermediate feedstocks’. Es decir, producto semi-acaba cu mester un proceso mas den un refineria completo. Awor ni pa esey e no ta sirbi mas, a menos cu hinca mas di 2.000 miyon dollar aden. E otro opcion, un upgrader manera Venezuela mes tin cuatro instala, no lo bira realidad tampoco, esey nos por comprende for di actitud di e futuro gobierno di e pais.

Conclusion: gobierno a haci bon di no contempla e refineria den su plannan pa futuro, pero pakico ta asina dificil pa bisa pueblo esey? Si bo ta asina ‘tough’ pa tuma e decision ey, y nos ta kere cu e ta esun corecto, pakico tanto pantomima alrededor di e asunto aki? Mas importante ta pa cuminsa elabora e plannan cu por aporta na desaroyo economico na San Nicolas cu, manera nos a expresa na varios ocasion, ta e prioridad number un pa cualkier gobierno. Pero un cos si: mester traha cu realismo. Realismo no solamente pa loke ta e proyectonan riba nan mes, pero tambe realismo di unda financiamento por bin. Den e situacion actual no ta solamente moralmente condenable pa kier financia proyecto cerca nos cu placa horta di e pueblo bisiña, pero e ta hinca nos den problema cu nos partner economico mas grandi, y cu e infrastructura di supervision financiero internacional.

Ta keda un problema si. Ken ta bay paga pa e desmantelamento di e refineria? Formalmente Citgo/Pdvsa tin un responsabilidad aki, cumpliendo cu e contrato firma na 2016, pero cuidao nos no ta haya un dori cu nos no por pluma…

 

You May Also Like

Kico ta gana cu mas ley sin implementacion adecua…?

Nos Conseho Consultivo (Raad van Advies), e principal consehero di gobierno riba tereno di ...

Gobernacion ta garna for di otro

E dianan di fiesta aki a kita atencion un poco di e acontecimentonan na ...

Mas sorpresa den eleccion

Swing vote a bolbe haci su trabao Eleccion di diabierna pasa lo duna hopi ...

Cifra dudoso den analisis AIB

Cu bastante fanfaria atrobe a publica e partinan aparentemente clave di e rapport di ...

editorial 2_15_1.jpg

Parlamento na nivel di custumber

Si kier papia di nivel Parlamento ayera tabata den su ‘mode’ custumbra. Esey ta ...

Sindicato a bira partner exclusivo? Den consulta di asuntonan social?

Den nos anterior Editorial nos a elabora riba e aspectonan legal di e cobranza ...