Antayera Ministerio Publico (OM) a anuncia cu a detene un sospechoso den e caso Apollo, cual ta e nomber pa e investigacion den cuadro di asesinato di John A. ‘Poentje’ Castro. OM ultimo a habri e caso aki bek despues di casi 11 aña. Esaki no ta e prome sospechoso cu OM tabatin wowo riba dje, mirando cu den juni di 2012 OM tabatin un sospechoso na bista cu tabata cera na KIA, algo cu OM nunca a declara publicamente. Dicon nan no a persigui e sospechoso aki, no ta conoci.

Vocero di OM, Ann Angela, a reacciona riba e pregunta si por divulga e inicialnan di e sospechoso en cuestion, pero den interes di e investigacion di OM no ta posibel ainda pa haci esaki. Ministerio Publico no ta descarta cu lo por tin mas detencion den e caso aki.

Interesante ta cu e prome detencion ta cay despues di practicamente 11 aña cu no a bisa casi nada tocante e caso. Prome cu un periodista di Bon Dia a haci un peticion a base di e Wet Openbaarheid van Bestuur (Ley di Transparencia di Hulanda, Wob) na e Instituto Forensico Hulandes (Nederlands Forensisch Instituut, NFI), no tabata conoci cu OM tabatin un sospechoso ya caba den juni di 2012 cu eventualmente OM no a persigui, ni kico a wordo manda na NFI apart di e Blackberry di Castro.

OM mester responsabilisa dicon investigacion no a duna fruto den 11 aña

Rond di juni di 2012 tambe a manda un pechi marca Nike, un jeans cu rasgo di sanger y tambe rasgo di sanger riba e muraya pafo di e cura di Castro su cas. A manda e material aki pa asina compara e perfil di DNA di e rasgonan haya riba e pechi y e jeans cu e perfil di DNA di Castro. Den e emailnan cu NFI a haci publico den cuadro di e procedura di Wob, ta mustra cu OM tabatin un sospecho cu e articulonan lo a pertenece na e sospechoso cu nan tabatin dilanti wowo, cu na e momento ey tabata cera na KIA.

E fiscal responsabel na e momento ey, esta Jaap Zondervan, den un email reaccionando riba preguntanan di e tecnico di NFI riba 9 di januari 2012 a bisa cu: “[…] nos no sa si e sospechoso tabata herida na momento cu e echo castigabel a tuma luga of un poco despues. Nos ta kere cu material di referencia [DNA di e sospechoso pa compara cu e DNA haya na e sitio] lo bin na su debido momento. E persona cu nos tin na bista actualmente solamente ta un bon sospechoso di cual nos por bay tuma material di referencia si a base di e analisis ta mustra cu: 1. E rasgo di sanger riba e muraya no ta di Poentje y 2. E sanger riba e jeans di [sospechoso, nomber no divulga] ta duna un perfil di DNA. Den e caso aki nos solamente tin ‘circumstantial evidence’ y pues nos no tin un rason cu ta fuerte suficiente pa hustifica tuma e DNA di e sospechoso.”

A base di e documentonan disponibel ta mustra cu e condicionnan pa por considera e sospechoso cera na KIA como un sospechoso probabel, no tabata cumpli toch cu e perfil. Sinembargo mirando cu OM nunca a duna informacion riba esaki, ta dificil pa yega na un conclusion.

Maske no ta cla con OM a yega na e sospechoso anonimo cera na KIA, ta remarcabel cu despues di haci un investigacion den e archivonan di corant, ta mustra apesar cu OM tabatin e sospechoso bou wowo, a bisa den media cu no tin nada nobo pa divulga den cuadro di e investigacion. Pa esnan interesa por consulta entre otro e articulonan di corant Amigoe di Aruba di 22 di december 2012 cu titulo ‘Desafortunadamente nada nobo pa raporta’ [‘Helaas niets nieuws te melden’]. Den varios otro medio, manera Awe Mainta di 22 di december 2014 a sali cu lo tin un sospechoso na bista, pero OM nunca a confirma loke medionan a skirbi e tempo ey.

Transparencia?

Segun OM di Hulanda, a base di articulo 6 y 10 di e Tratado Europeo pa Derechonan Humano (EVRM), e ley di transparencia di Aruba (Landsverordening openbaarheid van bestuur, Lob) y hurisprudencia di Corte Europeo di Derechonan Humano (EHRM. 26 april 1979, ECLI:NL:XX:1979:AC6568 (Sunday Times/Verenigd Koninkrijk). [Nota di redaccion: E pagina di OM di Hulanda ta referi na e Wob, pa referi na OM di Aruba ta reemplasa esaki cu e Lob.]

OM tin un deber di duna informacion na e publico tocante e funcionamento di e sistema hudicial. Sin transparencia den con e sistema hudicial ta funciona, no ta posibel pa tin un bon debate publico riba e sistema hudicial, mientras den undebate publico ta necesario pa e funcionamento di e sistema y tambe ta un balor importante pa por mantene un sociedad democratico. E hurisprudencia menciona ta indica tambe cu duna informacion den caso penal individual ta mira mas y mas como un interes independiente.

Den cuadro di esaki mester menciona cu un periodista di Bon Dia a haci un peticion pa informacion a base di e Lob na e minister di husticia encuanto e investigacion di e asesinato di Poentje Castro riba 8 di maart 2021, cual e minister no a contesta te dia di awe. Riba 21 di mei ultimo e periodista a entrega un obheccion ficticio contra e echo cu e minister no a contesta e peticion aki, cual e minister tampoco a contesta.