rector UA programa specialisacion (1).jpg

Rector di Universidad di Aruba, Dr. Glenn Thode a destaca e importancia di e acuerdo cu a keda firma entre Universidad di Aruba (UA) y  Maastricht University. El a bisa cu esaki ta un colaboracion estrecho caminda Maastricht University como partner di nan ta otorga un programa cu ta cana cerca nos Alma Mater convertiendo UA, como un instituto di specialisacion tambe. 

E acuerdo di cooperacion academico entre ambos universidad di un programa nobo di “double degree” of dobel titulacion den Derecho Fiscal Internacional y Europeo. E acuerdo aki a demanda alrededor di un aña y mey di trabou, y finalmente el a keda firma cu presencia di Minister di Enseñansa y vice decano di e facultad di Huridico di Maastricht University, Dr. Jos Hamers.

Retonan y specialisacion

Nan a topa diferente reto y bareranan y un di nan tabata e reglanan cu ta conta rond di e diploma na Hulanda y esunnan di Aruba. Pa tal motibo el a gradeci tanto e minister di Enseñansa di Aruba, pero tambe esun di Hulanda cu a traha conhuntamente cu UA su facultad di Derecho  pa nan por baha e bareranan pa haci e acuerdo di cooperacion academico universitario aki posibel.

Dr. Thode a bisa cu UA su programa ta diseña di tal forma cu ta enfoca riba e tipo di graduado cu Aruba mester. “Aruba mester di hendenan cu por haci hopi cos pareu. Kiermen cu nos no ta super specialisa riba niun programa educacional”, el a bisa. Pero tin biaha e mercado ta exigi specialisacion. E tipo di specialisacion aki ta mucho costoso y casi imposibel pa un mercado hopi chikito pa ofrece programa super specialisa.

E programa aki ta un intento di banda di UA pa trece e tipo di specialisacion aki. Dr. Thode a bisa cu despues di duna e prome paso aki, nan ta convenci cu pa futuro nan lo continua cu e colaboracion aki cu otro institutonan universitario pa nan por ofrece mas tipo di specialisacion.

Costo y interes

Un aspecto pa tene na cuenta ta e gastonan cu un tipo di programa aki ta demanda economicamente. Rector di UA a bisa cu nan lo publica den corto tempo tur e parti di e gastonan. Ya caba el a anuncia cu e costo pa studiante di afo of internacional lo ta mas halto. E ta conta pa tur studio, pero e tambe pa e tipo di programa di specialisacion aki.  Segun Dr. Thode e tipo di studio specifico aki ta wordo financia su mes. “E no ta algo cu gobierno ta duna nos un cierto cantidad di placa, manera pa e otro programanan, kiermen no ta subsidia”, el a bisa.

Pa mantene e tipo di programa aki UA lo bin cu un forma pa pidi e contribucion di studiantenan. E studiantenan local nan lo mantene e costo mescos cu nan ta pidi tur studiante cu ta bin studia cerca nan bou cierto condicion ora cu e ta parti di nan studio regular. Si e no ta parti di nan studio regular, e ora ey e costo lo ta algo diferente.   

Dr. Thode a bisa cu nan ta spera cu lo tin hopi studiante na Aruba y pafo di nos pais tambe lo tin oportunidad di haya un diploma di tanto Maastricht University y di Universidad di Aruba. El a laga sa cu durante diferente aña Universidad di Aruba a haya hopi biaha e peticion di nos hendenan mes pa nan  bin cu e tipo di programanan aki, esta e programa specifico di derecho Fiscal.

Durante e proceso cu UA a diseña e programa aki a papia cu diferente interesadonan di nos comunidad cu lo ta cliente pa e programa aki, y nan mes a curasha UA pa bin cu e programa aki di double degree. Rector di UA ta convenci tambe cu pafo di Aruba e mercado t’ey pa bin atende e tipo di programa aki ya cu e lo wordo duna na idioma Ingles. Nan tin pensa pa introduci e programa aki na luna di september proximo.

LEAVE A REPLY

Please enter your comment!
Please enter your name here