Gobierno ta trahando riba e posibilidad pa otro aña y pa prome biaha den historia democratico di nos isla, nos ciudadanonan haci uso di nan derecho di vota via sistema electrico.

Riba e topico aki, prome minister Evelyn Wever-Croes a referi sin bay mucho den detaye, pendiente cu e mesun directora di Censo lo divulga mas informacion proximamente. Sinembargo e prome mandatario a wordo confronta cu e pregunta si ta necesario pa bin cu un sistema di eleccion electronico, considerando e situacion di austeridad di finanzas publico, y teniendo na cuenta cu Aruba su cantidad di votado ta relativamente chikito.

Premier Wever-Croes a bisa cu ora el a haya e proposicion di Censo pa bay na votacion electronico, su prome pregunta tabata riba e gasto cu un sistema asina ta demanda for di caha di gobierno. “Nos no tin hopi medio financiero pa haci inversion grandi,” el a bisa.

Den e presentacion cu e mandatario a haya for di Censo a wordo ilustra riba e gastonan envolvi cu un eleccion. E no por bisa cu e tabata budget neutral compara cu esun manual, pero si e sistema electronico ta compensa cierto gastonan cu awor ta haci pa un eleccion manual cu lo bira hopi menos si ta haci esaki digitalmente.

Ademas e proceso di conteo tin biaha ta yega te madruga laat y ainda nan no ta haya tur conteo cla. Tur esaki ta genera mas gasto pa atende cu tur e hendenan cu ta keda traha, vigila y garantisa siguridad. Tur e trabou aki segun e mandatario ta un aspecto cu lo wordo evita via votacion electronico. Ademas bo por haci e conteo manual su mañan. Un sistema digital y/of electronico ta facilita cu e proceso di votacion lo por bay mas lihe, el a bisa.

 

Sistema electronico

E introduccion di e sistema electronico lo wordo haci cu esun manual tambe, kiermen tur dos sistema pareu. E mandatario a bisa cu esaki ta permiti cu lo por crea e ambiente di confiansa cerca e votado cu e sistema ta traha bon y cu gobierno por weita cu e ta funciona bon tambe.

Den linea grandi a base di e presentacion cu e prome mandatario a haya for di Censo, el a splica cu e carchi di votacion riba dje lo tin pa prome biaha un barcode. Ora cu bo ta yega na e mesa di votacion nan ta scan e barcode y aunke nan ta menciona e nomber di e votado pa asina e huradonan y observadornan por señala ariba nan listanan el a laga sa cu nos autoridad electoral lo tene na cuenta aspectonan di privacidad.

Na ora di vota den e lokaal bo tin e potlood cora pa bo votacion manual y tambe lo tin un mashin pa bo hacie digitalmente. E mashin ta saca pa bo un print out cu ta mustra bo kico bo a caba di vota, y asina bo ta verifica si ta corecto si of no. Despues bo ta deposita bo voto manualmente tambe. E ta haya cu e ora ey lo tin dobel control.

Na final nan ta conta e votonan di e urna, pero tambe nan tin’e den computer. E sistema digital lo por duna un resultado preliminar basta prome cu e contamento manual di e votonan bin cla. Pero di otro banda, e sistema manual ta brinda e posibilidad di check e cantidad di voto deposita pa asina e stembureau por realisa e conteo manual tambe.

El a nenga of rechasa cualkier insinuacion di parti di e sector di oposicion cu gobierno kier bin cu e sistema electronico pa controla e resultado di eleccion. “Esey no ta e caso!,” el a bisa categoricamente. E mandatario a agrega cu e sistema di votacion electronico ta uno prepara pa medio di departamento di Censo, y lo ta bon pa e mesun directora di Censo bin cu mas informacion y aclaria cualkier duda of insinuacion rond di e sistema nobo aki.

Den nos pagina di Ciencia & Tecnologia edicion di ayera nos a publica tocante e sorto di mashin cu ta usa pa votacion electronico, e costo, riesgo y beneficionan di e sistemanan aki. E articulo aki ta disponibel riba nos pagina di internet www.bondia.com of scan e QR code.