Como director di e unico arbobedrijf na Aruba, Sr. Ru Croes a keda invita pa forma parti di Expo Labor 2016. E actividad cu ta tuma luga diasabra 23 di april proximo den Renaissance Convention Center ta habri y destina pa tur esnan buscando trabou of cu kier sa mas di nos mercado laboral na Aruba. Croes hunto cu varios otro orador y experto ta ofreciendo durante henter dia tayer y sesionnan gratis riba un variedad di temanan selecta pa yuda bo bay dilanti profesionalmente.
Sr. Croes ta di opinion cu e topico di Arbowet ta interesante pa tur hende, tanto pa e dunado di trabou como e empleado pa sa mas di kico ta e iniciativa cu actualmente e Minister di Labor ta hibando, pero tambe kico ta e idea di Medwork como arbobedrijf riba e ley aki.
‘Ta importante paso e ta regarda nos tur e manera con nos ta traha; e condicionnan di labor, no financiero ni tocante e contract, pero esnan fisico, con hende ta traha cu otro y e parti di siguridad. Tur esaki ta importante pa salbaguardia e productividad laboral,’ segun Croes.
Expo Labor 2016 ta un proyecto di Ministerio di Labor di drs. Paul Croes den cooperacion di Departamento di Labor y Departamento pa Progreso Laboral. E meta ta pa brinda tur esnan buscando un trabou of cu ta desea pa haci un avance den nan carera profesional, e oportunidad y hermentnan necesario pa alcansa exito.
Un total di 53 booth consistiendo di empresanan local ofreciendo mas di 400 cupo di trabou, como tambe instancianan di entrenamento y conseho laboral lo ta presente pa brinda informacion. Porta ta habri pa 10’or di mainta y entrada ta completamente gratis. Pa mas informacion tocante e sesion di Sr. Croes y tur otro, bishita e pagina di Facebook: Expo Labor Aruba.
.jpg "Philipine van Aanholt 26 luga prome dia Laser Radial Weganan Olimpico")
